LCPO: Dili biyaan ang balay karong Semana Santa
CEBU, Philippines — Mipahimangno ang kapolisan sa Lapu-Lapu City Police Office (LCPO) sa mga molupyo nga dili magkumpiyansa sa ilang pagbakasyon atol sa pagtimaan sa Semana Santa sa sunod semana.
Si Police Colonel Elmer Lim miingon nga bisan kun ilang hingusgan ang pagpatrolya dili nila mabantayan ang tanan.
Matud ni Lim mas maayong ang katawhan magmatangon sab aron dili makahigayon ang mga badlungon sa pagbiktima kanila.
Si Lim miingon nga mas maayong dili magpalabi og dugay sa pagbakasyon, kun walay magbantay sa balay, kinahanglan kining kandadohan ug sirad-an ang mga pultahan ug mga bintana.
Ibton sab ang tanang appliances ug ipasulod tanang mga importanteng gamit diha sa balay sa dili pa mobiya.
Si Lim miingon nga kon adunay kasaligan nga mga silingan mahimo usab kining pahibaw-on aron dunay makabantay sa balay.
Laing pahimangno sa panahon sa pagbakasyon mao ang paglikay nga magdala og dakong kantidad nga salapi, siguroon nga madala ang mga gikinahanglang dokumento sama sa driver’s license ug rehistro sa gimaneho nga sakyanan.— IBM (BANATNEWS)
- Latest