Mga lodging house monitoron

CEBU, Philippines —  Ang Cebu City Police Office (CCPO) mag-monitor sa mga lodging house sa Dakbayan sa Sugbo nga posibleng gihimong suyopanan ingon man lugar alang sa pagbuhat sa ubang krimen sama sa human trafficking.

Kini human sa buy-bust operation sa Philippine Drug Enforcement Agency (PDEA)-7 ug Carbon Police Station diin nasikop nila ang lima ka tawo diha sulod sa usa ka lodging house sa dalan Leon Kilat, Barangay Kalubihan.

Ang maong lodging house giingong gihimong drug den sa mga suspetsado.

Matud ni Police Lieutenant Colonel Janette Rafter, deputy city director for operations sa Cebu City Police Office nga ang maong mga lugar pwede nga mahimong tinubdan sa krimen.

Ug gumikan niini ang CCPO nagplano nga moumol og kalihukan alang sa mga tag-iya og lodging house aron magkahiusa sila sa pagsulbad sa problema ingon man pag-umol og solusyon niini.

Matud ni Rafter nga kadtong mga indibidwal o establisamento nga dako og matabang sa imbestigasyon apan dili mokooperar adunay tulobagon sa balaod.

Niadtong Marso 8, 2023 nasikop sa kapolisan sa Carbon Police Station atol sa ilang buy-bust operation si Kenneth Ongsuco Lerio diha sa Magallanes Street, Barangay Ermita niining siyudad.

Nakuha gikan sa suspetsado ang 35 gramos nga shabu nga nibalor tanan ngadto sa P238,000.

Matud ni Police Major Kenneth Albotra, hepe sa Carbon Police Station nga padayon pa nila nga gi-verify ang impormasyon nga kini tag-iya sa KSL Lodge.

Samtang si Rafter nagkanayon nga ang mga nadakpan sa CCPO sa ilang Anti-illegal Drug Operations mga bag-ong players.

Ang pagdakop sa maong drug personalities ug pagkompiska sa mga dagkong balor sa ilegal nga drugas resulta kini sa pagpakabana sa komunidad.  -  BDB (BANATNEWS)