Inayawan gikatakdang mopagawas og pundo alang sa nasunogan

CEBU, Philippines — Mga opisyal sa Barangay Inayawan ang magtigum pa aron masuta unsay ilang ihatag sa mga nasunogan sa Sitio Little Plaza sumala pa ni Kapitan Kirk Bryan Repollo nga nahinabi sa Banat News.

Matud pa Repollo, padayon pa ang pakisusi sa Department of Social Welfare and Services kung pila sa kinatibuk-an ang apektado sa maong sunog.

Sumala pa ni Repollo, magtigum pa ilang mga opisyal aron masayran kung pila pa ang ilang calamity fund ug pila ang ipagawas aron iayuda sa mga nasunogan.

Gibutyag usab ni Repollo, ilaha usab tukion kung unsay ilahang ihatag kwarta ba o housing materials ngadto sa mga nasunogan.

Sa talaan sa DSWS nga gipangulohan ni Portia Basmayor, adunay 22 ka mga panimalay ang apektado diin 15 ang total damaged; 3 partial damaged; 4 slightly damaged, 41 ka mga pamilya ang naapektohan o 163 ka individuals.

Ang kagamhanan sa Dakbayan sa Sugbo nihatag na usab sugod ug pagkaon sulod sa tulo ka adlaw, relief goods, bugas ug delata lakip usab ang housing materials.

Ang mga nasunogan naa karon sa Emmanuel Jacs Inayawan Sports Complex. —/IBM (BANAT NEWS)