Kaugmaran sa luna nga tukoran sa provincial center gipaspasan sa DPWH

CEBU, Philippines — Gipaspasan karon sa Department of Public Works and Highways (DPWH)-7 ang kaugmaran sa lugar diin anha itukod ang Cebu Provincial Government Center sa Lungsod sa Balamban.

Subay kini sa tinguha ni Gobernador Gwendolyn Garcia nga ibalhin ang government seat sa Probinsiya sa Sugbo gikan sa Dakbayan sa Sugbo padulong sa Lungsod sa Balamban.

Atol sa tigom ni Garcia uban ang engineers sa DPWH-7 gipangulohan sa regional director nga si Ernesto Gregorio Jr., ang opisyales sa ahensiya nagkanayon nga ila nang gipasapsan ang site development ug ang pagtukod sa foundation structure sa replica sa executive building sa Kapitolyo diha sa 2.3 ektarya nga luna nga naangkon sa Kapitolyo.

Matud ni Michelle Languido, acting provincial assessor nga naka-secure ang Kapitolyo og unom ka tituladong luna sa maong site diin niabot tanan ngadto sa 17.5 ka ektarya.

Si Garcia nagplano nga mopalit pa og 50 ka ektarya nga luna duol sa maong site aron nga makatukod pa ang Kapitolyo og provincial ug regional offices sa national government.

Sa niaging tuig, ang national government nigahin sa General Appropriations Act (GAA) og P200 milyones alang sa maong proyekto diin gamiton kini sa probinsiya alang sa site development.

Si Senador Sonny Angara nisaad usab og laing P100 milyones alang sa pagtukod  sa edipisyo samtang si Senador Francis Tolentino nisaad og P80 milyones alang sa maong proyekto.  (BANATNEWS)