Night Market sa Colon gitak-opan na

CEBU, Philippines — Gitak-opan na ang Colon Night Market niadtong nilabay’ng Lunes ug gitinguha nga ibalik na usab kini sa buwan sa Abril o Hunyo niining tuiga.

Kini ang gibutyag ni Maria Pino, pangulo sa Garbo Asenso Sumbanan Alyansa (GASA) nga maoy nagpaluyo sa night market operation.

Matud ni Pino nga ang ilang kataposan nga adlaw sa night market wala nagpasabot nga mao na ang kahumanan tungod kay ilahang tan-awon unya kong kanos-a na usab kini ibalik.

Si Pino nagkanayon nga tan-awon nila sa buwan sa Abril o Hunyo apan magdepende ang tanan sa sitwasyon unya tungod kay sa nilabay nga mga katuigan mobukas man sila una sa buwan sa Hunyo sa dili pa moabli ang klase.

Ug gumikan kay wala na ang night market hawan ug hamugaway na usab ang dalan Colon.

Si Pino nipadayag nga makapaabot na usab ang mga Sugbuanon og nindot pa unya nga pagbukas pagbalik sa Colon Night Market pipila ka buwan gikan karon. (BANATNEWS)