Gasa sa Senyor Sto. Niño ang ilang anak

CEBU, Philippines — Hilabihan  ang kahingawa sa usa ka managkapuyo nga taga Talisay City kansang anak kaniadto nga gimabdos giingong ‘dili normal’ apan tungod sa ilang hugot nga pag-ampo ug pangaliya sa Balaang Bata wala mahitabo ang kabalaka sa mga doktor.

 Si Catherine delos Reyes , taga Laray, Siyudad sa Talisay miingon nga sa dihang gisabak pa niya ang iyang anak gipahibalo siya  sa doktor nga ang dili normal ang bata nga iyang gisabak.

Matud pa niini, dihang unom ka buwan na siyang nagsabak nahibulong sila tungod kay gipangutana sila sa doktor nga mihiling kaniya kun duna silang duha sa iyang bana kaliwat og dwarfism o unano.

 Matud pa ni Catherine gipasabot sila sa doktor bahin sa nakita sa ultrasound nga kini nakapahugno sa ilang kasingkasing kay dili normal sa maong mga buwan sa gisabak ang gidak-on sa mga kamot ug tiil niini nga pwerte ka mugbo.

Naghatag og kagul-anan sa duha ang eksplinasyon kanila sa doktor ug wala silay laing gidangpan human sa magpa checkup kondili ang pagsimba sa Basilica Minore del Sto. Niño ug nangamuyo sa Balaang Bata nga dili unta matinuod ang kabalaka sa doktor ug hatagan sila og normal ug himsog nga anak diha sa iyang sabakan.

Mao sab kini ang hinungdan nga kanunay silang mosimba sa basilica samtang nagmabdos pa si Catherine ug gihugtan ilang mga pag-ampo.

Gihimo kini ni Catherine ini og uli niya gikan sa trabaho bisan og magabhian siya paguli sa Talisay City.

Tuod man, nagtuo si Catherine nga gidungog ang ilang mga pag-ampo tungod kay ang bata nga iyang gihimugso normal man kini ug himsog ang panglawas. Ang ilang anak nabunyagan pagduha ka bulan niini. Ang estorya sa managkapuyo ug sa ilang anak usa sa mga daghang milagro nga pamatuod sa pagkamanggihatagon sa Batang Hesus ngadto sa mga deboto ug sa mga magtutuo. (BANATNEWS)