Kapitolyo mopasaka og ejectment case batok sa HPG

CEBU, Philippines — Ang Probinsiya sa Sugbo posibleng mopasaka og ejectment case batok sa Highway Patrol Group (HPG) human sa pakyas nga negosasyon aron bakantehan sa HPG ang luna nga gipanag-iya sa Kapitolyo diha sa dalan Gorordo Avenue, Dakbayan sa Sugbo.

Atol sa tigom ni Gobernador Gwendolyn Garcia tali sa opsiyales sa HPG gipahibalo niya si HPG Regional Director Niel Francia ug hepe sa HPG-Metro Cebu Silvestre Cenia nga ang Kapitolyo nitanyag sa HPG nga i-relocate ang buhatan niini ngadto sa 737 metro kwadrado nga luna diha sa Sitio Sudlon, Barangay Lahug, Siyudad sa Sugbo ubos sa “usufruct agreement”.

Apan base sa report sa Capitol Information Office giingong wala giseryoso sa HPG ang maong tanyag.

Gikatakda usab sa hunta probinsiyal ang pag-revoke sa deed of donation nga gipirmahan sa niaging administrasyon sa Kapitolyo niadtong tuig 2018.  Sayo pa, si Garcia nagkanayon nga depektoso ang maong deed of donation tungod kay wala kini pagtugot gikan sa Commission on Audit (COA).

Si Garcia nagkanayon nga ang maong donasyon sa “highly commercial area” nga gipanag-iya sa Kapitolyo nakapaalkansi sa probinsiya ug sa mga konstituwente niini.

Matud ni Garcia nga ang 679 metro kwadrado nga luna nga adunay P200,000 matag metro kwadrado ang value nikabat na ngadto sa P135 milyones ang kinatibuk-ang value niini.

Atol sa regular session sa hunta probinsiyal niadtong Lunes, si Garcia niawhag sa hunta probinsiyal nga hatagan siya og authority nga mopasaka og kaso batok sa HPG. (BANATNEWS)