Lima ka sakyanan nagkarambola, usa patay

CEBU, Philippines — Lima ka sakyanan ang nagkarambola diin usa ang namatay ug adunay mga naangol sa maong insidente kagahapon sa hapond diha sa national highway sa Lungsod sa Sogod.

Ang mga sakyanan nga nagkarambola naglangkub sa duha ka pasaheroang bus, usa ka pickup truck, auto ug cargo truck.

Si Police Lieutenant Phil Restauro, hepe sa Sogod Police Station nagkanayon nga ang auto ni-overtake kini diha sa blind curve tungod kay taas kaayo ang linya ug pagkakita sa Ceres bus nihunong kini aron dili maigo ang auto.

Giingong nipadaplin ang auto ug nisulod og balik sa linya samtang ang Auto Bus kusog ang dagan niini hinungdan nga wala makapugong ang preno ug nibangga ngadto sa lubot sa Ceres bus hinungdan nga ang Ceres bus nilahos ngadto sa balay ug naapil og daro ang tag-iya niini nga si Garlito Dela Cerna, 66-anyos kinsa nakabsan sa kinabuhi.

Matud ni Restauro nga ang Hilux nga pickup truck ug cargo truck nabiyahe kini paingon ngadto sa amihanan samtang ang Auto Bus paingon sa Dakbayan sa Sugbo.

Dugang ni Restauro nga gawas sa namatay adunay mga naangol usab sa maong hitabo. (BANATNEWS)