Dakbayan sa Sugbo mopalit og dugang modular tent

CEBU, Philippines — Gitinguha karon sa kagamhanan sa Dakbayan sa Sugbo ang pagpalit og dugang mga modular tent alang sa Cebu City Disaster Risk Reduction Management Office (CCDRRMO) nga  gamiton sa evacuation center  sa mga nasunogan diha sa Sitio Tugas, Barangay Mambaling.

Nasayran nga kapin sa 500 ka tawo ang nawagtangan og pinuy-anan human niigo ang sunog diha sa maong lugar. Kasamtangang gipahiluna ang mga nasunogan diha sa eskwelahan sa maong barangay.

Gikataho nga ang siyudad mopalit og dugang 82 ka modular tent diin ang pundo nga gamiton sa pagpamalit kuhaon gikan sa Quick Response Fund sa CCDRRMO.

Sa laing bahin , gi-report sa Cebu City Public Information Office nga ipadayon gihapon sa Cebu City Disaster Risk Reduction Management Council nga gipangulohan ni  Atty. Gerry Carillo  ang pagpalit og mga container van nga himuong evacuation center sa mga nasunogan .

Dugang paliton mao ang duha ka bag-o nga heavy equipment, boom truck, ug dump truck nga gibana-banang nagkantidad ngadto sa P16 milyones. .

Samtang sugdan na unya ang ang pagpalawom sa sapa diha saTagunol ug ang pagpahiuli sa tres metros nga easement niini.

Base sa datos sa Department of Social Welfare and Services, dul-an sa 300 ka pamilya ang apektado unya sa pagpatuman sa easement.

Gipangitaan sa kagamhanan sa siyudad og relocation site ang mga maapektohan sa clearing operation. (/BDB) (BANAT NEWS)