DA misiguro nga dunay igong supply sa sibuyas bombay sa kabisay-an

CEBU, Philippines — Gitataw sa Department of Agriculture -Central Visayas nga duna ray igong supply sa sibuyas bombay sa rehiyon busa dili angayan nga malisang ang katawhan.

Aminado hinoun ang maong ahensya nga duna'y ubang lugar sa nasud nga nagnihit sa maong klase sa lamas, apan gitataw sa DA-7 nga wala maapektohi niini ang Kabisay-an.

Suma pa sa tigpamaba sa DA-7 nga si Quian Ibarra nga dunay mga lugar sa Kabisay-an ang na-produce sa bombay ug usa na niini ang Squijor.

Samtang nag-produce usab ang pipila ka lugar sa Mindanao og bombay paingon dinhi sa Kabisay-an.

"Sa pagka-karon,ang presyo niya modagan og P100 to P120 ang kilo , " matud pa ni Ibarra.

Ang sibuyas bombay maoy komon nga lamas alang sa mga sud-an o ubang pagkaon.

Gipaneguro sa DA nga dunay lapad nga monitoring aron maseguro nga mamintinar ang igong supply niini.

Nipadangat usab ang kagamhanan og mga programa alang sa pag-abag sa mga mag-uuma nga naapektohan sa pandemya ug kalamidad.

Pipila usab niini ang nakatagamtam og skills training isip paghatag og dugang kaalam sa ubang aspeto sa panguma. —MEL (BANATNEWS)