Bag-ong guidelines alang sa isolation ug quarantine period gipagawas sa EOC

CEBU, Philippines — Niisyu ang Cebu City Emergency Operations Center og updated nga guidelines alang sa gitas-on sa isolation ug quarantine period suma pa ni Konsehal Joel Garganera.

Mao kini ang pagasundon alang sa nagpositibo na sa COVID-19 ug kinahanglan mapalayo o i-separate sila aron dili makatakod sa uban.

Alang sa  fully-vaccinated nga asymptomatic ug kadtong dunay mild symptoms , kinahanglan nga mag-isolate og pito ka adlaw ug 10 ka adlaw  gikan sa adlaw sa pag-test alang sa partially vaccinated ug dili bakunado.

Kun moderate ang estado , kinahanglan nga naka-isolate sulod sa 10 ka adlaw sugod sa paglugwa sa sintomas alang sa mga fully vaccinated , o 10 ka adlaw gikan sa pag-test  alang sa partially vaccinated ug dili bakunado.

Alang sa severe ug critical cases, kinahanglan nga mag-isolate og 21 ka adlaw alang sa fully vaccinated , o 21 ka adlaw alang sa  partially vaccinated ug dili bakunado.

Kun immuno-compromised, 21 ka adlaw alang sa fully-vaccinated,  ug 21 ka adlaw alang sa partially vaccinated ug dili bakunado inubanan sa negatibong resulta sa RT-PCR.

Kun maghisgot usab og quarantine ,  mao kini ang kadtong na-close contact sa nagpositibo o naghuwat sa ilang swab test results.  Buhaton kini aron sila maobserbahan kung natakdan sab o naa bay sintomas nga gibati.

Alang sa asymptomatic ug negatibo nga close contact, mag-quarantine kini og lima ka adlaw alang sa fully vaccinated, ug 14  ka adlaw gikan sa pag-expose alang sa mga partially vaccinated ug dili bakunado.

Nihatag usab og information material  ang EOC alang sa mga andamunon samtang naka-home isolation ug kini mao ang pag-andam  sa basic needs nga sama sa pagkaon , tubig, load sa cellphone nga molanat og pipila ka adlaw.

Mangita og laing lugar sa balay nga maoy gamiton sa pag-isolate aron dili makatakod. Iandam daan ang contact number sa doktor ug uban pa nga emergency hotlines.

Kanunay usab nga mag-andam sa thermometer ug oximeter.

Moinom lang og paracetamol kun moabot na og 38.5 ang temperatura sa lawas. Gitambagan usab kini nga tumaron ang vitamins ug ang pagkaon og prutas ug utanon. —IBM (BANATNEWS)