Lungsod sa Argao midili sa pangumbira atol sa pista

CEBU, Philippines — Gipahibalo sa Kagamhanan sa Lungsod sa Argao ang polisiya alang sa kapistahan sa ilang dapit ilabi na sa mga kumbira.

Matud pa nga ang mga kauban ra gyud sa balay o mag-pamilya ang mahimong mag-uban sa salo-salo.

“Apan tungod kay ania man gihapon kita sa COVID-19 pandemic, kadto lang inyong naandan nga gikaipon og puyo sa balay mao lang usab ang inyong ikasalo sa pagpangaon. Dili tugotan ang wa magpuyo sa inyong balay nga mamista sa inyo,” tipik sa advisory nga naka-post sa Facebook Page sa Kagamhanan sa Argao.

Gipaneguro sa kadagkuan sa lungsod ang hapsay ug yano nila nga pagsaulog sa pista sa ilang dapit karong Setyembre 28 ug 29 ug hugot nila nga gipabantayan ang mga lugar nga maoy kasagaran dagsaan og  mga tawo.

Dunay gihimong panagtambayayong ang kagamhanan ingon man ang simbahan sa maong lungsod alang sa malinawon nga pagsaulog sa pista.

Aron masiguro ang pagpatuman sa health protocols dunay gidestino nga mga otoridad sa nagkadaiyang dapit aron mapatuman ang crowd control.

Lakip sa monitoron og maayo mao ang simbahan merkado ug kadagatan sa Lawis.

Ang PNP, MDRRMO, BPAT, CPAG, mga barangay tanod, ALARM communications group ug uban pang pundok motabang usab pagpatuman sa mga lagda.

“Ang simbahan ug ang Argao LGU nagkauyon nga bisan ania kita sa pandemic, magsaulog gihapon kita sa pangilin ni Sr. San Miguel, atong Mahal nga patron sa Argao,” dugang mensahe sa maong lungsod nga gipaagi sa public information office.

Si Konsehal Regie Sanchez,chairman sa peace and order sa Konseho sa Argao malaumon sa kooperasyon sa publiko. MEL (BANATNEWS)