Terminal sa trisikol buksan sa Mandaue

Cebu, Philippines — Buksan na sa sunod semana ang bag-ong terminal sa mga tricycle sa merkado publiko sa Dakbayan sa Mandaue.

Nunot  sa maong pagbukas maoy gilauman sa buhatan sa Traffic Enforcement Agency of Mandaue (TEAM) nga masinati ang suliran  sa trapiko nga mabag-ohan sa operasyon niini diha sa dalan P. Ceniza sa kilid sa nahisgotang merkado publiko.

Si Edwin Jumao-as nga maoy executive director sa TEAM sa iyang pamahayag miingon nga 30  ka mga tricycle ang mogamit niini. Apan dili sila magdasok sa terminal sanglit ang 15 kinahanglang magdagan samtang ang kinse magpaabot og pasahero.

Matud pa ni Jumao-as nga ang 180 ka mga tricycle drivers   nga sakop sa Looc Mandaue Tricycle Operators- Drivers Association (LOMANTODA Inc.)  maoy mo-operate sa nahisgotang terminal.

Ang  maong mga tricycle mahimong mobiyahe gikan sa merkado publiko paingon sa Barangay Looc, Cambaro, Alang-Alang, Opao ug Umapad.

Ang matag tricycles driver mobayad og P20 sa matag adlaw ug mobayad usab og P2 sa matag gawas nila gikan sa sulod sa maong terminal. (BANAT NEWS)