Ibones: Ang gihilantan labing maayo magpa-checkup

CEBU, Philippines — Si Dr. Jeffrey Ibones, Cebu City Health Officer niawhag sa mga tawo nga gipanghilantan karong panahona nga labing maayo nga magpa-checkup gyud sa doktor.     

Matud ni Ibones nga tungod sa usab-usab sa tempo sa panahon mo uso ang hilanat.

Nasayran nga nag-trending diha sa social media ang topic sa hilanat nga giingong daghang gipanghilantan tungod sa init nga panahon unya mokalit og ulan.

Giawhag usab ni Ibones ang katawhan nga aron malikayan ang mga sakit kinahanglan gyud nga regular nga motumar og bitamina, mokaon ug matulog sa saktong oras, moinom kanunay og tubig ug magdala og payong kon molakaw.

Matud usab ni Ibones nga kon motambag man gani ang doktor nga magpa-swab test labing maayo nga tumanon kini ilabi na nga usa ang hilanat sa mga sintomas sa COVID-19.

Dugang ni Ibones nga sa maong pamaagi mahibaw-an dayon ug dili mosamot ka komplikado ang sitwasyon. BDB (BANATNEWS)