Pagbunok sa uwan nimugna og baha ug pagdahili sa yuta

CEBU, Philippines — Unom ka mga pagdahili sa yuta ang natala sa South ug North Districts sa Cebu City atol sa grabeng pagbunok sa uwan kagahapong adlawa sumala pa sa . Cebu City Disaster Risk Reduction and Management Office.

Ang maong buhatan miingon nga pito ka mga molupyo sa La Guerta, Barangay Lahug ang naapektahan sa pagdahili sa yuta alas 8:57 sa buntag kagahapong adlawa.

Matud pa nga ang pagbunok sa uwan kagahapon niresulta sa pagdahili sa mga yuta sa barangay Kalunasan, Lahug, Apas, Pung-ol Sibugay, Taptap, ugTagbao.

Samtang 22 sab ka pamilya nga nagpuyo sa Sitio Pili, Barangay Malubog ang gipabakwit human nga nisulod sa ilang mga panimalay ang tubig baha.

Matud pa nga misaka ang tubig sa sapa diha sa Barangay Malubog, Sinsin, Cambinocot, Bonbon hasta ang sapa diha sa General Maxilom Avenue, Kamputhaw Bridge, Tejero Creek, ug McArthur Boulevard.

Tungod niini, nalubog sab sa tubig ang Barangay T. Padilla diin 20 ka pamilya ang naapektahan diha sa Sitio Soquite ug Bukog,  samtang 15 ka pamilya sab sa Sitio Indian ug A Valle. —Deogracia William Bemida, Silliman University  Intern/IBM

Wa pay vaccination plan alang sa kapolisan

Dili moubOs sa 800 sa 12,000 ka mga sakop sa kapulisan sa Police Regional Office (PRO) -7 ang nabakunahan na sumala sa Regional Health Service Unit (RHSU) -7.

Si Police Lt. Colonel Marilou Aboloc, RHSU-7 Chief nagkanayon nga 400 na niini ang nabakunahan na sa first dose.

Gibutyag pa ni Aboloc nga gisumite na sa National Headquarters ang tanan nga datos sa mga personnel sa PRO-7 aron masubay kun pila na tanan ka polis ang mabakunahan.

Dugang pa ni Aboloc nga kadtong nabakunahan mao ang mga kapulisan nga naapil sa Priority Group gikan sa A1 hangtod sa A3. Ang mga nabakunahan gikinahanglan sab nga makigalayon sa RHSU-7 aron ma-monitor ang mga diverse effects.

Samtang, giawhag sab nila ang tanang 50 ka mga police stations ubos sa Cebu Police Provincial Office (CPPO) nga makigalayon sa ilang tagsa-tagsa nga Local Government Unit (LGU) alang sa pagpabakuna.

Ang direktiba ni CPPO Director Police Colonel Engelbert Soriano gikinahanglang magpabakuna gyud ang mga polis apan dili kini mandatory gawas lang kun ang ilang hepe maoy modesisyon.

“Ni-remind ko na din sila na if they had the chance to take the vaccine from their respective LGUs, go na sila kasi may directive na rin din naman kami,”sigun ni Soriano.

Giangkon ni Soriano nga kining pakigalayon sa nagkadaiyang police stations ngadto sa ilang mga LGUs inisyatiba kini aron maprotektahan ang mga polis isip mga fronliners tungod kay sa pagkakaron wala pay vaccination plan nga gihatag ang RHSU-7 gawas niini.

“So whatever comes first, kung LGU or sa amin, basta the earliest possible opportunity, mag pa ano (vaccine) na sila,”ingon pa ni Soriano.

Alang sa mga polis nga nadestino sa CPPO headquarters nakigalayon na si Soriano kang Gobernador Gwendolyn Garcia alang sa ilang pagbakuna.

Tungod kay kadaghanan sa ilang mga sakop mga residente gikan sa Lalawigan sa Sugbu gihangyo niya sila nga magparehistro lang sa ilang tagsatagsa ka lungsod gawas kung hatagan na sila og bakuna gikan sa kagamhanan sa lalawigan alang ra sa kapolisan sa CPPO.

Ang CPPO adunay dili moubos sa 2,320 ka mga sakop sa tibuok probinsya.

“Very generous naman ang LGU, kasi lahat ng nakausap ko na mayors,kasama talaga nila sa priority nila yung local police nila, good news ‘yun sa amin,”.— IBM (BANATNEWS)