Pagbukas sa rota sa PUJ ulahi na ang tanan–Niñal

CEBU, Philippines — Ang pag-isyu ni Mayor Edgardo Labella sa Dakbayan sa Sugbo og executive order kabahin sa subling pagbukas sa mga rota sa public utility jeep ang “ulahi na ang tanan” matud sa usa sa mga lider sa grupo sa sektor sa transportasyon.

Matud ni Kapitan Clifford Niñal sa Barangay San Nicolas ug board member sa Cebu Integrated Transport Service Multi-purpose Cooperative (CITRASCO) nga pipila sa ggmay nga mga operator ang naglisod karong panahona tungod kay kasagaran sa ilang mga unit ang nangadugta na gumikan kay usa ka tuig na kini nga wala makadagan.

Adunay pipila ka mga drayber ang nanguli na sa ilang tagsa-tagsa ka probinsiya.

“Ang uban nga operators ang nagduha-duha og renew sa nanga-expire nila nga mga unit tungod sa kadako og gasto. Wala baya silay kita tungod kay dugay na sila nga wala kadagan”, matud ni Niñal.

Naapektohan usab og maayo ang mga tradisyonal nga PUJ sa pagtumaw sa mga air conditioned o modernong PUJ.

“Maalkanse man gyud ang atong karaan nga mga PUJ. Kay ang ubang pasahero kong makakita og modernong PUJ nga dunay aircon adto gyud sila mosakay”, ni Niñal pa.

Ang Cebu City Jeepney Task Force nga gipangulohan ni Kosehal James Cuenco maoy nagrekomendar sa subling pagbukas sa tanang rota sa PUJ dinhi sa siyudad.

Sa kasamtangang sitwasyon kapin lang sa 20 ka mga rota ang gibuksan.

Ang siyudad adunay kapin sa 60 ka rota. BDB (BANATNEWS)