Napulo ka balay sa Mandaue naugdaw sa sunog

CEBU, Philippines — Napulo ka balay ang hingpit nga naugdaw sa nahitabong sunog alas-6 ang takna kagahapon sa buntag diha sa Sitio Pilit, Barangay Cabancalan sa Dakbayan sa Mandaue.

Si Senior Fire Officer One Antonio Montajes, imbestigador sa Mandaue City Bureau of Fire Protection miingon nga sagad sa mga naugdaw ginama sa gaay maong dali kaayong nasunog.

Ang kadaghanan niini mga paabangan nga panimalay.

Base sa pasiunang imbestigasyon, ilang nasayran nga nagsugod ang kalayo sa ikaduhang andana sa panimalay nga gipanag-iya ni Joy Desamparado.

Si Desamparado gikatahong namahayag nga nangatulog pa sila dihang kalit lang miulbo ang kalayo sa sulod sa lawak nga gikatulgan sa duha niini ka mga anak.

Nagtuo  kini nga ang gi-charge nga cellphone sa iyang anak maoy hinungdan sa maong sunog. Maayo nalang nga nakamata sila ug dali nga nakagawas sa ilang panimalay.

Si Montajes miingon nga mohimo pa sila og dugang imbestigasyon ug pagtino kun pila ang danyos sa maong sunog. —/IBM (BANAT NEWS)