Duha konsehal sikop sa tigbakay

CEBU, Philippines — Duha konsehal sa lungsod, usa ka kagawad sa barangay ug usa ka kawani sa gobiyerno ang nalakip sa 55 ka mga tawong gisikop sa kapolisan tungod sa tigbakay diha sa Gallera de Laganason, Barangay Esperanza, Lungsod sa Poro niadtong adlaw nga Domingo.

Ang mga elected officials ug government employees nga nangadakpan mao sila si Poro Councilors Ashley Otadoy, 54, Andrew Zurita, 38 ug Barangay Mercedes Councilor Dennis Camomot, 48.

Samtang ang  usa trabahante sa DILG-7 naila nga si Cliff Otadoy, 52. Samtang ang uban pang dinakpan mga residente sa maong lungsod. Ang mga dinakpan  gikatahong nakalapas sa PD 449 Illegal Cockfighting amended by PD 1602.

Ang operasyon gilusad sa hiniusang pwersa sa Provincial Intelligence Unit , 1st PMFC, Poro MPS base sa impormasyong ilang nadawat nga dunay operasyon sa tigbakay sa maong dapit, wala kini permit.

Ang kapolisan nakahipos og mga ebidensyang naglakip sa upat ka mga bihag, unom ka mga manok nga samaran, duha ka buwang, ug P15 mil nga gituohang pusta.

Si Mayor Edgar Rama nagkanayon nga iyang huwaton unsay rekomendasyon sa DILG batok sa duha ka konsehal.

“Sa akong tan-aw mag hulat ko sa recommendation sa DILG if naay violation nga na commit sa atong elected officials, then ang balaod gyud ang matuman,” matud sa mayor. Matud niya, dunay memorandum gikan sa DILG nga nagsuspenso sa operasyon sa sabong.

Ang gipasabot sa Mayor mao ang memorandum nga gipagawas ni DILG-7 Director Leocadio Trovela niadtong Abril 8, 2021 nga nagsuspenso sa operasyon sa sabong, entertainment venues, fairs/peryas, ug kid amusement industries sa mga lugar ubos sa Modified General Community Quarantine (MGCQ).

Ang exempted lang niini mao ang pagpahigayon og e-sabong nga lisensyado ug gi-regulate sa Philippine Amusement and Gaming Operations.

Apan alang sa ni Bise Mayor Luciano Rama, kinahanglang matuman ang balaod subay sa nahimong kalapasan.

Matud sa bise mayor matawag kini nga “pag-abusar.” “Personally, in my own opinion, the full force of the law should be applied to them. Dapat official ka di ka magapil- apil og sugal- sugal,” matud sa bise mayor.— Le Phyllis F. Antojado/IBM (BANATNEWS)