Mga batang lumad nakauli na sa Davao

CEBU, Philippines — Nakalarga na balik sa Davao del Norte kagahapong adlawa ang uban sa mga batang lumad nga na-rescue sa kapolisan ug social workers sa gikan sa Bakwit School program sa usa ka non-governmental organization sa tempraryo nilang lawak-saringan sa sud sa University of San Carlos Talamban campus sa nakalabay nga semana.

Ang Commission on Human Rights Central Visayas  naghimo karon og kaugalingong imbestigasyon kabahin sa pangangkon sa kapolisan nga ilang na-rescue ang 19 ka mga batang lumad gikan sa pito ka mga hamtong nga ilaha nang napasakaan og kaso.

Ang Chief Investigator sa CHR-7 Leo Villarino nga nahinabi sa Banat News miingon nga nakalarga na ang uban sa mga lumad kagahapong adlawa pabalik didto sa Talaingod, Davao del Norte.

Samtang nasayran sab gikan sa giluwatang pamahayag sa DSWD-7 nga sa local SWDO (Cebu City) ug ang ilang buhatan (DSWD-7) nagpasilong kadtong duha ka mga batang lalaking lumad ug upat ka batang babayeng lumad nga walay mga ginikanan. Ang LSWDO sa Cebu City ug LSWDO sa Talaingod mao nay magsabot kabahin sa Parenting Capability Assessment ayha pa nila i-turnover sa mga ginikanan o guardians ang mga bata.

Ang Bakwit School program gidumala sa NGO nga Save Our Schools Network. Apan gipasangil sa kapolisan gibansay ang mga bata sa walhong pundok aron gamiton batok sa gobiyerno. Pasangil nga gipanghimakak sa maong NGO ug sa USC-Talamban.

Ang mga ginikanan sa mga bata mipasangil nga walay pananghid kanila nga dad-on dinhi sa Sugbo ang ilang mga anak nga sukad pa 2018 gkuha didto sa ilang dapit. Si Villarino miingon nga lakip sa ilang imbestigahon kun dunay bay nahimong kalapasan sa human rights ang mga polis ug mga otoridad nga nihimo sa maong operasyon.— IBM (BANATNEWS)