Reklamo kabahin sa basura sa Talisay nimenos na

CEBU, Philippines — Nimenos na ang reklamo nga nadawat kalabot sa koleksyon sa basura sa Dakbayan sa Talisay.

Kini maoy gitug-an ni Edwin Nierves, pangu sa Ecological Solid Waste Management (ESWM) sa siyudad.

Una niini, si Nierves wa makalimod sa daghang reklamo nga ilang nadawat gumikan sa kadaghan sa guba nga garbage truck nga iya sa pribadong kompaniya nga maoy nikontrata pagkolekta sa basura.

Gani ang maong mga reklamo naabot na sa social media.

Matud pa niya nga si Mayor Gerald Anthony “Samsam” Gullas Jr. nitugot nga ipagamit ang ilang tulo ka garbage truck nga maoy moabag sa pribadong kompaniya sa pagkolekta sa basura.

Nagkanayon si Nierves nga gikan sa 50 ka reklamo nga ilang madawat matag adlaw mikunhod na lang kini sa napulo og dali ra usab kini nila nga ma-respondihan gamit ang tulo ka garbage truck nga gipanag-iya sa Siyudad sa Talisay. —MEL (BANATNEWS)