Labella mipahimangno sa mga TPUJ Drivers pagtuman sa health protocol
Cebu, Philippines — Gipahinumdom kanunay ni Cebu City Mayor Edgardo Labella ngadto sa mga traditional jeepney drivers ug operators nga natugutan na nga makabiyahe sa kadalanan sa Siyudad sa Sugbo nga mosunod gyud sa safety ug health protocols.
Matud ni Mayor Labella nga dili magpanuko ang kagamhanan sa siyudad sa pagpahunong sa ilang operasyon sa higayon nga makalapas kini sa mga lagda nga gipatuman aron malikayan ang pagkatap sa COVID-19.
“So hangyo lang ko sa mga drivers ug operators please be very observant on the health protocols and also the requirement set forth by the LTFRB, duna tay mga marshal nagsunod-sunod ana atong gihatagan og assignment pag-monitor sa atong mga jeepney drivers”, sigon ni Mayor Labella.
Hinoon, ang Mayor miingon nga sa iyang bahin wala pa siya kadawat nga dunay nireklamo kalabot sa mga jeepney drivers ug operators nga wala mosunod sa health protocols.
Nasayran nga sa 1,300 ka mga jeepneys nga gilauman nga i-evaluate sa Cebu City Task Force naa lang sa 30 porsyento ang nagpa-inspection ug 20 porsyento lang ang natugutan nga makabiyahe.
Si Mayor Labella mipasabot nga gitugyan na niya kang Konsehal James Anthony Cuenco, Chairman sa Cebu City Jeepney Task Force ang pagpatuman sa makuting evaluation sa mga units kay dili mahimong magpataka og hatag og pagtugot sa makabiyahe nga mga jeepney drivers.
“Nanghinaot ta mga jeepney drivers nga makasabot sa atong katuyuan”, ni Mayor Labella pa. (BANAT NEWS)
- Latest
