Police riding in tandem sa Talisay gidayeg sa CPPO

CEBU, Philippines — Giawhag sa kadagkuan sa Cebu Provincial Police Office (CPPO) ang tanang police station nga mohimo sab og programa sama sa polis riding in tandem nga gihimo sa Dakbayan sa Talisay.

Kini human nakita ni Lt. Col. Reyman Tolentin, Deputy Provincial Director for Operation (DPDO) nga dako og ikatabang ang magmotorsiklo nga polis aron mapugngan ang mga kriminal.  Matud pa niya nga paspas ang pagresponde sa mga polis nga magmotorsiklo tungod kay makalihay kini sa trapiko.

Siya nagkanayon nga unta himuon kini sa ubang mga Local Government Unit (LGU) ang maong programa aron makatabang sa kahapsay ug kalinaw sa ilang dapit.

Una niini, si Police Major Gerard Ace Pelare, pangu sa Talisay City Police Station nilusad sa programang polis riding in tandem human ang dakbayan gipaubos na sa Modified General Community Quarantine (MGCQ).

Kini human namatikdan nga daghan sa mga tawo ang nanggawas na sa ilang mga panimay. Gawas niini gipangandaman sab sa kapulisan ang panahon sa kapaskuhan diin kadaghanan sa mga tawo ang makadawat og bonus og modagsa sa nagkalain-laing establisamento. /MEL (BANATNEWS)