Rekord sa COVID-19 sa DOH, LGUs wa magtakdo

CEBU, Philippines — Namatikdan nga dili magtakdo ang talaan sa Department of Health ug mga local government units kalabot sa kaso sa coronavirus disease (COVID-19).

Kini sama pananglit niadtong Hulyo 5 diin ang, Cebu City Health Department nitala og 6,141 nga kinatibuk-ang kaso sa COVID-19 sa siyudad apan ang DOH-7 nitala og 6,761 ka kaso.

Si Dr. Mary Jean Loreche, tigpamaba sa DOH Central Visayas, nipasabot nga gikan sa molecular laboratory facility sama sa Vicente Sotto Memorial Medical Center (VSMMC) Sub-National Laboratory, ang resulta ipadala kini sa Regional Epidemiology and Surveillance Unit (RESU) ug sa LGU.

Ang RESU maoy mo-validate sa resulta samtang ang LGU padad-an alang sa contact tracing.

“Supposedly si RESU iya pa na i-validate, iya pa na tan-awon kung wala bay duplication of names, ang spelling, repeat ba ni siya, new case ba ni so kinahanglan before na ni LGU data ipagawas, si RESU una iya usa na i-validate. So once na ma-validate na ni RESU mao na ang ihatag sa LGU,” matud ni Loreche.

Matud ni Loreche nga ang LGU dili unta una mopagawas og datus nga wala gi-validate sa RESU.

Kagahapon wala na mopagawas ang CCHD og daily monitoring report sa COVID-19 subay sa rekomendasyon sa Inter-Agency Task Force aron malikayan ang kalibog sa publiko. Ang CCHD niawhag sa publiko nga adto nalang motan-aw sa talaan sa DOH samtang ila pa husayon ang report.

Anaa na sa 10,273 an ang kinatibuk-ang kaso sa COVID-19 sa Central Visayas niadtong Hulyo 5, 2020.

Sumala sa DOH-7 nga sa kinatibuk-an, anaa na sa 6,380 ang active cases; 3,527 ang nakarekober ug 366 ang namatay.

Lapu-Lapu City

Samtang nakatala og 58 ka bag-ong kaso sa COVID-19 ang Dakbayan sa Lapu-lapu sulod sa duha hangtud kagahapon.

Base sa Facebook post ni Mayor Junard “Ahong” Chan, 25 ang natala kagahapon ug 33 niadtong Domingo.

Kini mao ang duha sa Barangay Babag, duha sa Bankal, tulo sa Basak, usa sa Calawisan, tagduha sa Gun-ob ug Ibo, tag-usa sa Mactan, Marigondon, Pajac ug Poblacion, upat sa Pajo ug tulo sa Pusok.

Lima sa 30 ka barangay sa Dakbayan sa Lapu-Lapu ang adunay taas og ihap sa kaso sa COVID-19 matud ni Chan.

Kini moa ang Barangay Pusok nga dunay 111, Gun-ob, 203; Pajo, 88; Basak, 74; ug Looc, 59.

Danao City

Sa pikas bahin ang kagamhanan sa Dakbayan sa Danao nakatala sab kagahapon og 26 ka kaso COVID-19.  Matud sa Facebook post sa lokal nga kagamhanan sa dakbayan nga maoy ilang gihimo ang contact tracing activity sa nakapaduol sa mga pasyente.

“Ang City Health Services Office (CHSO) mo-reach out sa mga ospital aron mahibaw-an ang number of recoveries nato,” nagkanayon ang post sa Facebook.

“Pahimangno sab sa publiko nga dili pilion ang lugar nga matngunan. Tanang lugar karon sa Sugbo kay posible na nga naay COVID-19 carrier. Protektahan gyud ang kaugalingon,” dugang sa pahimangno sa maong post.Romeo T. Limpangog, Rowena D. Capistrano/GMR