Odd-even scheme sa ECQ Pass gipatuman sa Dakbayan sa Danao

CEBU, Philippines — Nipatuman og odd-even scheme ang Dakbayan sa Danao sa ilang gipanghatag nga quarantine household passes sa mga residente subay sa gipatuman nga enhanced community quarantine (ECQ).

Sa Facebook page sa Danao City Government gisaysay nga ang maong scheme, ma-apply sa tanang mga residente sa Danao ug "residente sa uban nga munisipalidad nga makasulod sa Danao City."

Ang quarantine household pass adunay control number kon diin ang uwahi nga numero maoy basehan kun unsa nga adlaw ug oras mamahimong makagawas ang holder sa maong pass.

"Tan-awa ang last number sa imong QHP. Ang last number naa say corresponding nga adlaw nga mahimo kang mogawas sa panimalay dala ang QHP ug ID," pagbasa sa post. Ang mga control number adunay numero nga nagtapos sa 0, 2, 4, 6, 8 mamahimong makagawas sa adlaw nga Martes, Huwebes, Sabado ug half day sa adlaw nga Domingo gikan sa alas 12:01pm hangtod alas 6 sa gabii.

Samtang ang mga QHP nga ang control number nagtapos og 1, 3, 5, 7, 9 makagawas sa adlaw nga Lunes, Miyerkules, Biyernes ug half-day sa adlaw nga Domingo gikan alas-6 sa buntag hangtod alas-12 sa udto. Ang odd-even scheme sa Danao pinasubay sa Executive Order. No. 26 Series of 2020 sa mayor. Ang tumong niini nga dili mag-abot sa merkado sa Poblacion ang mga atwo.

Niadtong Abril 10 kini gipagawas apan si Police Major Maribel Getigan, hepe sa Danao Police nagkanayon nga kagahapong adlawa pa gyud nila kini napatuman tungod kay sa unang mga adlaw gipasabot pa nila kini  sa katawhan.

"Gituyo na siya kay 42 barangays man ang Danao unya sa 42 ka barangays pila ana ang mountain barangays, if magdungan sila tanan mag clog up diri sa Poblacion kay ilang palitanan naa man tanan sa Poblacion gyud" matod ni Getigan. /IBM (BANATNEWS)