Pamilyang taga Bohol nga natanggong gitabangan

CEBU, Philippines — Ning panahon sa kalisud anhi gayud makita ang tinuoray nga kinaiya sa mga Sugbuanon nga pagkamatinabangon sa mga nanginahanglan bisan og wala na siyay para sa iyang kaugalingon.

Kini ang nasinati sa magtiayon gikan sa Sitio Tuburan, Bien Unido sa Bohol, nga na stranded sulod sa pipila ka semana sukad gipatuman ang enhanced community quarantine ug wala nay gipalarga gawas sa Sugbo.

Ang magtiayon mao sila si Warlito Timogan, 45, ug Amalia Tagaro, nga mianhi sa Sugbo aron pagpatambal sa ilang anak nga dalagita apan naatol nga sa paggawas nila sa tambalanan nasirad-an na sa pantalan. Ang magtiayon nipasilong una sa igsuon ni Tagaro apan tungod sa kagamay sa balay nag-sinardinas sila tanan didto payag sa Sitio Top Hills sa Barangay Lahug, Cebu City.Apan maayo nalang nga dunay malumo og kasingkasing nga naluoy nga si Anna Castro nga residente sa maong lugar ang nipagamit sa iyang junk shop aron temporaryong mapuy-an sa pamilya ug nagtinabangay  ang mga residente pagpanday og payag gamit ang mga sin sa junkshop para kanila.

Si Castro miingon gusto unta niyang itipon sa ila ang pamilya hangtud matapos ang krisis sa COVID-19 apan wala na silay lawak  nga mapakatulgan. Ang mga silingan nitabang sab pagpahuwam og mga kaldero, lutoan ug mga galamiton sa banay. Usa ka Daryll Villamero ang ni-post bahin sa magtiayon diha sa social media ug positibo kining gitubag sa mga Sugboanon nga nipadala og hinabang sa magtiayon para diaper ug panginahanglanon sa bata. Domingo sa buntag  naabtan sa Banat News diha sa gipuy-an sa pamilya ang usa ka Jessi Mori, taga Tagbilaran City sa Bohol nga sama sa pamilya nasirad-an sab sa biyahe pauli sa Bohol.

Si Mori nagdala og hinabang sa banay sama sa pagkaon ug gamay nga salapi. Nasayran sab sa Banat News nga si Bien Unido Konsehal Gay Mabanag namalihug og tawo dinhi sa Cebu City aron matabangan ang banay. /IBM (BANATNEWS)