Overpriced nga alcohol, lima sikop

CEBU, Philippines — Lima ang nasikop sa gipahigayon nga buy-bust operation sa Criminal Investigation and Detection Group 7 tungod sa pagpausbaw sa presyo sa palaliton.

Giila ang mga dinakpan nga sila si Rio Espejon, 45; Abel Daan Lacida, 18; Queeny May Rosa de los Reyes, 20; Janjan Alano, 23, ug Rightking Delos Reyes.

Matud ni CIDG-7 deputy chief, Police Major Ronald Allan Tolosa, nga nakadawat sila og kamanduan sa subling pagpanakop sa mga nag-overprice sa mga palaliton ilabi na sa panahon sa hulga sa coronavirus.

Unang gipahigayunan sa operation si Queeny May, Rightking ug Alano sa Tulay, Minglanilla dayun gisundan sa pagkasikop kang Lacida sa samang barangay.

Ang grupo ni Police Lieutenant Colonel Niño Lope Briones nipahigayon sa operasyon sa Barangay Lahug nga niresulta sa pagkasikop ni Espejon.

Matud ni Briones nga nakadawat sila og impormasyon kalabot sa mahal nga presyo sa pamaliton nga gibaligya pinaagi sa online.

Gibutyag ni Tolosa nga nagpadala sab sila og sample sa Food and Drug Administration (FDA) aron sa pagsusi kun lehitimo ug luwas ang mga alcohol ug sanitizer nga gipamaligya.

“For now, they can be charged for overpricing. Additional charges will be filed if we found that their products are not genuine and not registered with FDA,” matud ni Tolosa.

Gipasabot ni Tolosa nga magsilbi kini nga leksyon ngadto sa mga nisakay sa panahon ug nangilad sa publiko.

Nakuha mao ang mga kapin sa 20 ka karton sa alcohol ug nagkalainlaing botelya sa sa sanitizers. /GMR (BANATNEWS)