Mga residente sa Litmon naukay sa nidunggo nga sinsoro

CEBU, Philippines — Naukay ang mga residente diha sa Sitio Litmon, Barangay Poblacion, Dakbayan sa Talisay tungod sa usa ka sinsoro o sakyanan sa dagat nga gamiton sa pagpangisda ang  nasigpatan sa kadagatan diha sa lugar kagahpon sa buntag.  Ang maong sinsoro giingong adunay dala nga mga kuha nila nga isda ang nidunggo diha sa lugar.

Pipila ka mga residente sa lugar kinsa nakahibawo nga gidili ang pagbiyahe sa mga sakyanang pandagat ang dali nga nitug-an sa taga barangay.

Dali usab nga nikoordinar ang opisyales sa barangay ngadto sa kapolisan hinungdan nga girespondehan kini.

Matud ni Police Major Gerard Ace Pelare, hepe sa Talisay City Police Station nga ang maong sinsoro adunay 100 ka tripulante diin gikan kini sa Dakbayan sa Danao ug naabot sa lugar tungod kay namaligya kini og isda.

Ang mga tripulante sa sinsoro ang nakabantay nga adunay niabot nga mga polis hinungdan nga dali kining nisibat pahilayo sa lugar.

Si Pelare nagkanayon nga gidili gyud ang pagsulod sa mga sakyanang pandagat ilabi na nga naa pa karong hulga sa covid-19.

Nagpasalamat si Pelare sa katawhan nga dali nga nitaho sa mga otoridad kabahin sa ilang naobserbahan diha sa ilang lugar.

Nakig-alayon na usab si Pelare sa matag barangay aron paspas ang ilang pagtubag kon adunay illegal o gidili nga ilang Makita diha sa ilang lugar. /BDB (BANATNEWS)