Internal cleansing sa PNP hingusgan pa

CEBU, Philippines – Hingusgan sa Police Regional Office 7 ang pagpatuman sa internal cleansing sa kapolisan sa Central Visayas sa tuig 2020.

Kini maoy tinguha ni Police Brigadier General Valeriano De Leon, direktor sa PRO-7  subay sa gipahigayon nga traditional “New Year’s Call” sa tanang opisyal sa Central Visayas.

Matud ni De Leon nga subsob ang pagpahigayon sa paglimpiyo sa mga police scalawags, kampaniya batok sa ilegal nga drugas ug kriminalidad sa Central Visayas apan kinahanglan nga karong tuiga mas doblehon pa ang ilang trabaho.

Ilabi na sa ilegal nga drugas nga tinguha niya nga mas modaghan pa nga mga bodega o gipangtago-an sa ilegal nga drugas ang masakpan sa kapolisan sa Central Visayas aron mokunhod pa kini.

Si De Leon nagkanayon nga ang pagpahigayon sa traditional New Year’s Call sa Philippine National Police mao ang pagpakita ngadto sa lower units nga ang mga kalamposan sulod sa usa ka tuig himuon kini nga inspirasyon sa tuig 2020 nga mas malabwan pa nila ang ilang kalamposan sa tuig 2019.

“New Year’s Call is reminiscing the past and provide service to the people”, matud  ni De Leon.

Nakita ni De Leon ang ka kugi sa kapolisan sa Central Visayas ug naghinaot nga mapadayon pa kini ug magtinabangay sa tinguha ug pangandoy ni Presidente Rodrigo Duterte. /BDB (BANAT NEWS)