Talisaynon makapahimulos sa libreng laboratory

CEBU, Philippines – Ang kagamhanan sa Dakbayan sa Talisay nigama og kasabutan tali sa usa sa mga pribadong laboratory sa siyudad aron ang mga kabus sa siyudad makapahimulos sa libreng laboratory.

Si Mayor Gerald Anthony “Samsam” Gullas, Jr. nibutyag nga nigama sila og kasabutan tali sa Hi-Precision Diagnostics tungod kay iyang nakita nga adunay mga lab test nga wala diha sa Talisay City District Hospital hinungdan nga ang pagsulod sa kontrata sa pribadong laboratory dakong tabang sa tanan ilabi na sa mga kabus nga maglisod og bayad.

Matud ni Gullas nga adunay mga rekisitos nga sundon ang buot mopahimulos sa libreng laboratory.

Unang buhaton sa buot mopahimulos sa serbisyo sa HP Diagnostics mao ang pagdala sa request gikan sa doktor diin ang medical abstract adunay pirma kon na-admit, medical certificate nga adunay ngalan ug address, barangay certificate of indigency ug valid ID sa pasyente ug sa proseso sa papeles.

Ang mga rekisitos adto isumiter sa buhatan sa City Social Welfare and Development (CSWD) tungod kay ang maong buhatan man usab ang mohatag og clearance aron dad-on kini ngadto sa Hi-Precision.

Nagpasalamat usab si Gullas ngadto sa Hi-Precision tungod kay wala na sila lisud-lisora labot sa pagbayad niini.

Nagpinirmahay si Gullas ug ang tag-iya sa maong medical laboratory sa Memorandum of Agreement (MOA) niadtong niaging semana.

Gikatahong ubay-ubay na usab ang nakapahimulos sa programa ni Gullas lakip niini sa “Aksyon Agad”. (/BDB)(BANAT NEWS)