Football player nga na-missing napalgang patay

CEBU, Philippines — Patay ng nahaw-as gikan sa dagat ang 16-anyos nga batan-ong soccer player kinsa unang gika-report nga missing Sabado sa kaadlawon.

Ang nakit-an wala nay kinabuhi sa may Cabahug Shipyard, Barangay Opao, Dakbayan sa Mandaue alas-11 sa buntag kagahapong adlawa mao si Christian Joseph Lumapas, taga R. Colina Street, Barangay Ibabao sa maong dakbayan.

Nag trending sa social media ang pagkahanaw sa maong batan-on. Giingong katapusan kining nakita niadtong Sabado sa kaadlawon sa may Banilad Town Center nga nagsuot og itom ug t-shirts ug naka jogger shorts.

Kagahapon sa buntag ang kapulisan sa Police Station 5 nakadawat og tawag gikan sa mga tawo nga adunay nakit-ang patay nga lawas sa lugar hinungdan nga ila kining gisusi diha sa maong shipyard.

Nakita nga patay na ang maong lawas nga nakaitom ug t-shirts ug naka shorts diin gibana-bana nga minor de edad.

Ang head coach sa inilang pribadong eskuylahan miila sa lawas nga kini si Lumapas.

Si Police Corporal Janus Capangpangan nitug-an nga inisyal nilang hiling sa lawas wala silay nakit-ang foul play apan giawhag nila ang pamilya sa namatay nga ipaubos kini sa autopsy.

Nagduda ang kapolisan nga nilayat o natagak sa Marcelo Fernan Bridge ang batan-on ug gianod ang lawas niini padung sa maong shipyard. (/IBM)(BANATNEWS)