Guardo naproklamar na
CEBU, Philippines — Naproklamar na sa Commission on Elections isip ika-walo nga konsehal sa Cebu City North District si Konsehal Jerry Guardo.
Giproklamar si Guardo sa giumol nga Special City Board of Canvassers sa ulohang buhatan sa Comelec kagahapon sa alas 10 sa buntag.
Ang SCBOC gilangkuban nila ni Atty. Abigail Justine Cueresma-Lilagan isip chairman, Atty. John Rex Laudiangco isip vice chairman, Dir. Ester Villaflor-Roxas isip miyembro ug laing tulo ka support staff.
Giproklamar si Guardo human hingpit na nga gi-disqualified si Konsehal Alvin Arcilla sa Comelec En Banc nga makalansar sa niaging eleksyon sanglit nakahuman na siya sa tulo ka sunod-sunod nga termino.
“Lipay kaayo oy, kinsa gud magtuo na makaserbisyo pa ko pagbalik, na pilde na jud baya ko official resulta pag eleksiyon. Grasya ra jud ni sa Ginoo tanan,” matud ni Guardo.
Karong adlawa sa alas 10 sa buntag si Guardo manumpa atubangan ni Cebu City Mayor Edgardo Labella. (BANAT NEWS)
- Latest
