Tagakay sa Governor's Cup
Emmanuel B. Villaruel (Banat) - May 11, 2019 - 12:00am

CEBU, Philippines – Napilde sila bisan og naglabaw og 15 puntos sa second half atol sa Game-1 sa 'best-of-three' final series.

Kay wala na'y ugma nga nagpaabot kanila kun ugaling mapilde pag-usab, susamang panimalos ang gihampak sa Mandaue City Ballers ngadto sa Talisay City Aquastars.

Nadasig sa impresibong salida ni Gabriel Cometa ug sa pagbalik sa ilang big man nga si Kenneth Brillo, ang Mandaue Ballers mipapas sa 16 puntos nilang alkansi sa first half dayon na ngadto sa paglumos sa Talisay Aquastars, 94-76 sa Game-2 aron pagpuwersa og 'rubbermatch' sa ilang best-of-three finals sa 2019 Governor's Cup Inter-Cities and Municipalities Under 21 Developmental Basketball Tournament niadtong Huwebes sa gabii didto sa Mandaue City Cultural and Sports Complex.

Magtiwas ang Mandaue ug Talisay sa tagakay nga Game-3 karong alas-3 sa hapon diha sa University of San Carlos (USC) main gym  diin ang modaog mobulsa og P500,000 nga ganting salapi.

"It's (Game 3) is anybody's ballgame," matud pa ni Mandaue coach Gary Cortes nga migiya sa University of the Visayas (UV) Green Lancers ngadto sa talagsaong grandslam title sa Cebu Schools Athletic Foundation, Inc. (CESAFI) gikan sa 2016 ngadto sa 2018. 

"Ang team nga mas determinado ug doble ang paningkamot maoy modaog ani."

Dalaygon ang maong kadaogan sa Mandaue kay sa naghinapos nga bahin sa ikaduhang kuwarter nalubong man sila og 16 puntos, 30-46.

"Sa tinuoray lang wala kaayo ko mabalaka sa dihang nalubong mi. Nalipay pa gani ko kay it gave me a chance to push my boys to play harder," dugang pa ni Cortes. "Ako giingnan akong mga players not to give up. It's a championship game ug duna pa mi 20 minutes aron makarekober.

Tuod man, ang Mandaue misurprisa sa Talisay sa ilang full-court trapping defense pagsugod sa second half. Ang nakalitan nga mga Talisaynon nakuratan ug nakamugna og sagunson nga turnovers nga gipahimuslan sa Mandaue aron paglansang  og 13 ka sagunson nga puntos nga miresulta sa 31-4 rally ug nakahatag sa Ballers og 63-50 nga bentaha sa nahibilin nga 2:52 sa ikatulong kuwarter.

Naguba na ang duwa sa nagkagidlay nga   Talisay Aquastar ug wala na makabawi pa sukad niadto.

"Ang mga bata nakalitan gyud. Nawala ang ila focus sa duwa. That's part of the game man seguro. I try namo recover sa next game," angkon pa ni Talisay coach Rey Michael Guerra kabahin sa full-court trap sa Mandaue. 

"Ako sila giingnan nga kalimtan na lang to nga duwa, all-out mi sa next game ug amo gyud daugon."

Ang All-Star pointguard sa Mandaue nga si Cometa maoy nakahimo og labing dako nga kadaot sa Talisay pinaagi sa pagposa og 19 sa iyang 23 puntos sa second half nga iyang gipalaman og 16 ka assists sagad niini miresulta ngadto sa mga sayon nga basket nilang Brillo, Archie Buscay, Paul Sungahid ug Dwight Dabon.

Si Brillo  miambit og 15 puntos, siyam ka rebounds ug lima ka steals, si Buscay mitimbre'g 14 puntos, siyam ka rebounds, tulo ka assists ug tulo ka steals, samtang sila si Sungahid ug Dabon nagtampohay og 13 puntos.

Miamot si Lemuel Jake Gonzaga og 10 puntos sa Mandaue nga mipasud og 39 sa 69 nila ka itsa ug ila sab nga gilupig ang Talisay sa rebounding, 49-37.

Sa kinatibuk-an sa final half, ang Mandaue milatos sa Aquastars sa pinuntosay, 62-30 aron pagposte og 18 puntos nga demolisyon.

Si Keaton Clyde Taburnal maoy nangu sa Talisay uban ang 22 puntos, apil na ang walo ka sagunson nga puntos sa 12-0 run sa panahon nga moaksiyon sila og bulhot ugaling lang kay mikagar dayong sukarap sa kaulahian.

Sa gubat alang sa ikatulong dapit, si Jacob Fernandez miayag og 22 puntos, apil na ang walo ka rebounds ug unom ka assists, si Marvin Cortez mikulit og 15 puntos ug 11 ka rebounds, samtang si Albert Sacayan mitali og 13 puntos sa dihang gipaluhod sa Balamban Shipbuilders ang Minglanilla Archangels, 77-71 aron mouli bitbit ang P200,000 nga ganti.

GOVERNOR'S CUP
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with