Contractor sa CCMC giingong wala makatuman sa kontrata

CEBU, Philippines — Ang C.E Padilla Construction Inc. contractor sa bag-ong Cebu City Medical Center (CCMC) giingong napakyas sa pag-accomplish sa phase I sa proyekto subay sa nakalatid sa contract period. Si Cebu City assistant engineer Nilo Igot nagkanayon ang contractor wala makakompleto sa structural framework sa tambalanan niadtong Disyembre 27, 2018 nga naka-delay sa completion sa kinatibuk-ang building.

Ang construction sa CCMC building naglangkub sa duha ka phases diin ang first phase mao ang physical appearance o structural framework ug ang ikaduhang phase mao ang internal design.

Ang first phase mao ang lower grounds ngadto na sa 7th floor sa building nga nagkantidad og P514.97 milyones.

Matud ni Igot pipila sa rason sa delay mao ang construction materials tungod kay wala ma-deliver  sa tukmang oras.

Sa kasamtangan naghuwat sila sa evaluation report sa iyang team aron maka-assess kon unsay ilang lakang nga buhaton ngadto sa kontraktor diin posibleng ma-sanction kini gumikan kay napakyas sa pagkompleto sa phase I sa gihatag nga panahon.

Sa pagkakaron, ang phase I naa na sa 97 porsyento nga kompleto diin ang tulo ka porsyento mao ang completion sa elevator roof ug machine room.

Matud ni Igot nga ang slippage sa C.E Padilla dili tukma aron did-an ang maong contractor sa pag-apil sa bag-o pa lang nga bidding sa second phase.

Kahinumduman nga niadtong buwan sa Enero atol sa public bidding sa second phase nga nagkantidad og P283.4 milyones gi-award kini sa mao gihapon nga contractor.

Ang DEPW naghuwat na karon nga ang mayor mopirma og notice to proceed aron ang C.E Padilla makasugod na og trabaho sa second phase.

Nunot niini, ang first three floors sa bag-ong hospital building mamahimong operational karong buwan sa Abril imbes sa Marso.  BDB (BANAT NEWS)