Kagamhanan sa siyudad sa Sugbo mukuha og private-owned landfill

CEBU, Philippines — Nagplano ang Cebu City Government nga mosulod og kontrata tali sa usa ka private-owned landfill aron mamenusan ang gasto sa garbage hauling karong tuiga.

Ang pangulo sa Bids and Awards Committee nga si Ronaldo Malacora miingon ang Executive Department milihok na alang sa katumanan sa maong plano. Si Malacora nagkanayon nga usa kini sa pamaagi sa kagamhanan sa siyudad sa Sugbo aron mamenusan ang gasto sa garbage hauling.

Ang Department of Public Services mopinalisar sa maong lakang sa labing dali nga panahon aron matakda na ang public bidding.

Miingon si Malacora nga ang DPS dunay budget aron pag-finance sa bayrunon sa pagsulod sa kontrata direkta sa private dumping site.

Kun ang kagamhanan sa siyudad direkta nga mo-dispose og basura sa landfill ang tipping fee naa lang sa P700 matag tonelada. Base sa record gikan sa December 2016 hangtod sa December 2017, ang gasto sa hauling operation niabot og P300.4 million.

Sa 2018 ang siyudad nigasto og P420 million alang sa trash disposal apil na ang gasto sa pag-abang og mga heavy equipment.

Sukad ang kontrobersiyal nga Inayawan landfill gipasirad-an ang kagamhanan sa siyudad nagsugod og kontrata og service provider nga maoy mohakot sa basura sa siyudad paingon sa private owned dumping facility.

Gawas niini, niabang sab sila og 21 ka heavy equipment aron pag-fast track sa garbage collection process.

Sa kasamtangan ang Jomara Konstruckt Inc. mao ang service provider nga dunay hauling contract nga nagkantidad og P130.8 million nga gitagana gikan sa Enero hangtod sa buwan sa Hunyo ning tuiga.

Gidugang ni Malacora nga si Mayor Tomas Osmeña wala’y nakitang problema sa planong mosulod og kontrata tali sa private landfill importante moagi lang og saktong proseso.  LPM, (BANAT NEWS)