Bagyong Samuel posibleng motadlas sa Cebu

CEBU, Philippines — Gipangandaman karon sa mga nagkadaiyang local nga kagamhanan sa ang pagsulod sa bagyo nga gituohang posibleng moigo sa Sugbo.

Ang mga sakop sa Regional Disaster Risk Reduction Management Council (RDRRMC) nagpahigayon og emergency meeting niadtong Sabado aron pangandaman ang maong weather disturbance.

Ang Office of Civil Defense -Central Visayas (OCD-Region 7) nga maoy pangulo sa mao RDRRMC nisubay sa gihimong preparasyon sa nagkadaiyang lokalidad. Ang Philippine Atmospheric, Geophysical and Astronomical Services Administration  (PAGASA)-Visayas apil sa nihatag og impormasyon kabahin sa rota nga posibleng rumbohon sa bagyong Samue ug kon unsa ang posibleng kadaot nga dad-on niini.

Sumala pa ni PAGASA-Visayas OIC chief Alfredo Quiblat, Jr. base sa kataposan nilang analysis, ang bagyong Samuel motugpa sa ikaduhang higaon ugmang adlawa human sa Bohol ug Surigao.

Kon mahitabo kini , iisa ang storm warning signals sa tibuok probinsya. Maapektahan unya ang biyahe sa kadagatan ug posibleng maapektahan usab ang klase sa mga tunghaan ug ingon man trabahoan.

Apan gipasabot ni Quiblat nga posible usab nga mausab pa ang direksyong gitaak ni Samuel ug modiretso kini sa eastern Visayas o sa northern Luzon.

Sumala pa niya, may pagkaparehas ang direksyon ni Samuel sa bagyong Seniang nga miigo sa Sugbo niadtong Disyembre sa tuig 2014.

Si Samuel uwahing nasigpatan nga misulod sa Philippine Area of Responsibility kagahapon sa buntag ubos sa first tropical cyclone category Tropical Depression.

Gipaabot nga magkakusog kini ug posibleng ibutang sa third category Severe Tropical Storm.

Posible hinuon nga ini og tugpa niini sa kayutaan mohinay kini ug mobalik sa pagka tropical storm o  tropical depression.

Si Samuel nagdala og hangin nga 40 ngadto sa 60 kilometro kada oras. Gipaabot nga magdala kini og kusog nga uwan sugod sa adlaw nga Martes hangtud Miyerkules. Giawhag ang publiko sa pag-monitor kanunay sa mga balita sa panahon. (BANAT NEWS)