Cebuana gipatay sa bana

CEBU, Philippines — Hustisya ang gisinggit sa pamilya sa 28-anyos nga Cebuana kinsa gikatahong giunay og patay sa iyang 50- anyos nga banang usa ka artista nga Swede didto sa nasud sa lalaki sa Sweden.

Sumala pa ni Connie Bragas Regalado, coordinator sa Migrante Central Visayas nga dili pa mauli ang patay’ng lawas sa biktima nga si Mailyn ‘Maimai’ Sinambong-Aalam, usa ka lumad nga taga Medellin kay nagdagan pa ang imbestigasyon sa maong kaso.

Ang Migrante Central Visayas maoy miabag sa pamilya sa biktima ilabi na sa inahan niini nga si Maria Condem Sinambong. Sa giluwatang mensahe sa Migrante- Europe, usa ka organisasyon sa mga migranteng Pilipino didto, ilang gikondenar ang maong krimen sulod mismo sa ilang balay sa Kista, Stockholm, Sweden, niadtong Septiyembre 23, alas 11:30 sa gabii.

Base sa press statement sa Migrante- Europe, giangkon sa bana sa biktima nga si Steve Aaron Bakre Aalam ang krimen dihang kini giaresto sa kapolisan.

Matud pa sa maong press statement nga ang pamilya na mismo ang mibutyag nga pipila ka higayon gidapatan ni Aalam ang biktima ug ang ilang anak nga lalaki sa dihang dinhi pa sila sa Sugbo nagpuyo.

Sa report sa Philstar.com, ang tigpamaba sa Department of Foreign Affairs nga si Elmer Cato mipadayag nga mipasalig na si DFA Secretary Alan Peter Cayetano nga mabalik dinhi ang lawas ni Mailyn ug sigurohong mahatagan kini og hustisya.

Si Maria Fe Buhayan, suod nga higala ug maid of honor sa kasal sa duha niadtong Hunyo 6, 2009  nga taga Medellin nga nakahinabi sa Banat News nakurat sa balita.

Matud niya “sweet” kaayo ang duha sa dihang nagpuyo pa sila sa Dakbayan sa Lapu-Lapu.

“Grabe kaayo na ka pinangga ni Steve si Mailyn and Mailyn as a wife and as a mother is very caring and so lambing. Grabe na sila magbinabaay og away ni Steve pero pagkahuman kay sweet kaayo na sila,” si Buhayan miingon sa Banat News.

Human nga gidala ni Steve ang biktima ug ang ilang duha ka mga anak didto sa Sweden giingong wala na kaayo silay komunikasyon.

“Mag-skype mi usahay pero wa gyud na siya makahisgot nga gidapatan na diay siya,” tug-an sa maong higala ngadto sa Banat News.

Giingong usa ka aktor ug direktor sa pelikula didto sa Sweden si Steve ug matud pa nga nakatrabaho sab kini isip usa ka producer sa usa ka dakong kompanya diri sa Sugbo kaniadto. (BANAT NEWS)