15 ka proyekto gisusi tungod sa kakuwang sa dokumento

CEBU, Philippines — Kakulang sa procurement documents maoy hinungdan nga gipaubos sa imbestigasyon ang 15 ka proyekto sa imprastraktura sa miaging administrasyon ug posibleng endorsement sa Office of the Ombudsman.

Matud ni Assistant Provincial Legal Counsel Atty. Romielyn Macalinao, nagpadayon pa ang imbestigasyon sa Provincial Legal Office (PLO), lakip na ang pagtan-aw sa posibleng graft ug corruption cases batok sa mga personnel sa Kapitolyo nga nalambigit sa mga proyekto.

Ang 15 ka proyekto gikan sa unang 20 ka infrastructure projects nga giila sa administrasyon nga adunay kulang o kwestiyonableng procurement documents nga mikantidad og P120 milyon.

Sa 15 ka proyekto, tulo ang nakumpirmang walay makita nga dokumento. Lakip niini ang reinforced concrete lamp posts head stem nga 112 ka units sa Asturias, Carmen, Barili ug Toledo City nga nagkantidad og P550,000.

Apil usab ang laing reinforced concrete lamp posts head stem nga 467 ka units sa Balamban ug Toledo City nga P2.4 milyon ang kantidad. Matud ni Macalinao, pareho og contractor ang maong duha ka proyekto.

Ang ikatulong proyekto nga nakumpirmang walay makita nga dokumento mao ang concreting sa road ug shoulder section sa Aloguinsan nga nagkantidad og P4.7 milyon.

Laing gikuwestiyon nga proyekto mao ang road concreting sa Balamban nga P1.9 milyon. Aduna kiniy mga dokumentong nakit-an apan adunay pipila ka importanteng records nga kulang.

Matud sa PLO, 11 sa 15 ka proyekto adunay kulang nga mga dokumento sama sa performance bond, Department of Labor and Employment (DOLE) requirements ug Contractor’s All-Risk Insurance o CARI. Sa pagkakaron, wala pa gibayran sa probinsya ang 15 ka proyekto ug wala usab kini ma-transmit sa Commission on Audit (COA).

Ang imbestigasyon gisugdan human sa memorandum ni Gov. Pamela Baricuatro nga gipetsahan og July 28, 2025. Misunod niini ang suspension sa mga proyekto pinaagi sa Provincial Engineering Office niadtong Septiyembre 2025.

Gipasabot usab ni Macalinao nga wala’y proper turnover sa mga dokumento gikan sa miaging administrasyon ngadto sa kasamtangang BAC, hinungdan nga naglisod ang bag-ong BAC sa pagpangita sa mga records. Gihatagan sila og deadline niadtong miaging Biyernes apan nangayo og extension ang mga kanhi BAC secretariat.

Sa bahin ni Provincial Administrator Atty. Aldwin Empaces, gikan sa 125 ka proyekto ang unang gisusi sa administrasyon aron masiguro nga nasunod ang legal ug procurement requirements. Nahibilin ang 20 ka infrastructure projects nga nanginahanglan og dugang pagsusi, ug mikunhod kini ngadto sa 15.

Giklaro ni Macalinao nga dili lamang ang upat ka proyekto ang posibleng maendorso sa Ombudsman. Apil usab ang 11 ka proyekto kung dili masulbad ang ilang mga kakulang sa dokumento. Samtang, adunay mga proyekto nga nakompleto na ang records ug mahimong magpadayon.

Gawas sa Ombudsman, adunay lahi nga endorsement alang sa National Bureau of Investigation (NBI) nga pagadumalahan sa PLO consultant isip private complainant. Samtang nagpadayon ang proseso, wala pa ibutyag sa PLO ang mga ngalan sa mga partido ug ang eksaktong kahimtang sa kaso. (BANAT NEWS)