Siasar mihangyo ihunong na ang pagsaway kang Mayor Archival

CEBU, Philippines — Nihangyo ang chief of staff ni Cebu City Mayor Nestor Archival nga si Kenneth Siasar sa mga Sugbuanon nga hunungon na ang pagpanaway ug pagpanaot sa mayor.

Matud pa ni Siasar nga mas maayo nga hulipan ang mga pagsaway og aktibong suporta ug mga sugyot aron matabangan ang kagamhanan sa pagsulbad sa mga problema nga sukad pa sa nangaging mga administrasyon.

Sa press conference kagahapon, Setyembre 14, 2026, gisaysay ni Siasar nga ang dagkong problema nga giatubang sa dakbayan mao ang basura, baha ug pagkaguba sa kabukiran.

Suma pa niya ang maong mga problema dili bag-o ug dugay nang giatubang sa siyudad apan wala gihapon nasulbad bisan pa og pila na ka mayor ang milingkod.

Dugang pa ni Siasar nga ang mga problema karon sa siyudad wala kini gimugna ni Archival.

“Wala na nahimo sa administration ni Mayor Nestor Archival. So, siya lang ang nagdawat karon, na-inherit niya ang problema sa mga nangagi nga administration,” pulong pa ni Siasar.

Ang siyudad naglisod na sa pagdumala sa basura sukad gisirad-an ang Inayawan Landfill niadtong 2016. Napugos ang siyudad sa pagsalig sa Binaliw Landfill.

Sa wala pa nahitabo ang trash slide niadtong Enero 8, 2026, adunay mga residente sa Binaliw nga nireklamo na ngadto sa kagamhanan ug gipaabot na sab sa Department of Environment and Natural Resources (DENR)-7 ang problema sa sanitasyon sa Binaliw Landfill.

Sa isyu sa baha, si Siasar miingon nga dugay nang problema sa siyudad ang baradong mga sapa ug kuwang nga drainage system. Gibasol sab ni Siasar nga ang pagbaha hinungdan sa climate change, paspas nga urbanisasyon ilabi na sa downtown area ug sa mga barangay daplin sa sapa nga pirming malumos panahon sa kusog nga uwan. Samtang gihisgutan ni Siasar ang panginahanglan sa pag-atubang sa dugay nang mga isyu sa kabukiran, nag-atubang usab si Archival og pormal nga reklamo sa Office of the Ombudsman–Visayas may kalambigitan sa Monterrazas.

Ang reklamo gisang-at ni Ed Karlon Rama diin giakusahan ang mayor og graft, misconduct ug abuse of authority tungod sa giingong conflict of interest nga nalambigit sa iyang pagpanag-iya og yuta sulod sa subdivision. (BANAT NEWS)