12 nasikop sa ‘shabu tiange’ sa Talisay

CEBU, Philippines — Nasikop ang 12 ka gituohang adik sa giilang ikaduhang “shabu tiange” sa Dakbayan sa Talisay niadtong Biyernes sa gabii. Si Supt. Marlu Conag, hepe sa kapolisan sa dakbayan, nagkanayon nga ang Sitio Mananga, Barangay Tabunok maoy sunod sa Barangay Tangke nga nailang tiange sa shabu.

Hiniusang operasyon ang gihimo sa kapolisan human sa sumbong nga grabe na ang ilegal nga kalihukan sa lugar nga niresulta sa pagkasikop nila ni Raul Campana Lawat, 54; Raymond Turtur Pilapil, 24; Michael Ancajas Macaraya, 34; Anastacio Sanchez Canada, 58; Junrey Villacarlos Morona, 18; Alejandro Sellie Macaraya, 33; John Marco Tiro Inok, 23; Wennie Aroa Vaflor, 38; Junrey Navarro, 22; Arlene Labrador Lauron, 34; Miraluna Gonzales Tiro, 38, ug Karen Ann Macario, 37-anyos.

Sa kinatibuk-an nakasakmit sab og 95 ka gagmay nga pakete sa shabu, tulo ka medium nga pakete ug drug paraphernalia diin ang tanan mobalor sa P63,000.

Samtang nasikop ang lima ka pusher og shabu sa managlahing buy-bust operation sa kapolisan sa Dakbayan sa Lapu-Lapu sa niaging gabii diin nasakmit ang mokabat P200,000 nga kantidad sa shabu ug armas nga kalibre .38 uban sa mga bala niini.

Giila ni Police Chief Inspector Wayne Magbanua ang mga nadakpan nga sila si Benet Cabañez, 38, taga Sta. Maria, Pusok; Jeffrey Cabagte Ancero ug Malwin  Aambos Narvasa, 53, nagpuyo sa maong dapit.

Nakuha sa kapolisan ang 13 ka gagmay nga pakete sa shabu ug usa ka kalibre .38 nga armas uban sa mga bala.

Samtang sa Zone 1, Barangay Buaya sa maong dakbayan maoy nadakpan ang gikatahapang pusher og shabu nga si Cesario Embate Pino, Jr., hingkod ang panuigon nga nagpuyo sa maong  dapit. (Romeo T. Limpangog/GMR)(BANATNEWS)