Fuel cards giapod-apod na; Hinabang sa PWDs ipanghatag

CEBU, Philippines – Dul-an sa 100 ka Pantawid Pasada Program Fuel Cards ang naapod-apod kagahapon sa buntag sa Land Transportation Franchising and Regulatory Board (LTFRB) ngadto sa mga operator sa Sugbo diha sa buhatan sa Land Bank of the Philippines sa dalan P. Del Rosario, Dakbayan sa  Sugbo.

Ang maong cash card adunay sulod nga P5 mil diin mahimo kining magamit sa mga drayber sa pagpatubil og gasolina sa mga partner gas station sa LTFRB sama sa Shell, Phoenix ug uban pa.

Matud ni LTFRB-7 Regional Director Eduardo Montealto nga dili pa daghan  ang operator nga nikuha sa mga cash card hinungdan nga nanawagan sila sa mga jeepney operators sa pagdangop diha sa ilang buhatan aron sa pagsunod sa mga rekisitos sa pag-avail niini sama sa prangkisa nga dili expire, 1x1 ID picture ug bisan unsa nga government ID.

Gibutyag ni Montealto nga nakasinati sila og gamay nga problema sa maong cash card sama sa adunay nagpagasolina apan wala dayon magamit ang card tungod kay wala pa ma-online apan dali ra hinuon kining     nasulbad.

Sa pagka karon alphabetical order ang pag-release sa maong cash card diin letter A-B pa ang gipagawas.

Sa laing bahin, ipahigayon karong adlaw’ng Sabado ang ikatulong hugna nga pagpanghatag og financial assistance sa Persons With Disability (PWD) sa Dakbayan sa Sugbo.

Ang PWDs sa matag 80 ka barangay makadawat na sa ilang P1,000 nga financial assistance sugod sa alas 8:00 sa buntag ngadto sa alas 12:00 sa udto magdepende sa barangay kong asa dapita kini mag-apod-apod.

Si Lea Japson, pangulo sa Department of Social Welfare Services (DSWS) nibutyag nga dunay 12,000 ka PWD ang narehistro karong tuiga apan 9,986 lang ang ni-qualified sa pagkakaron.

Sa mga dili makakuha karong Sabado adunay padayon nga pagpanghatag sa lobby diha sa Cebu City Hall o sa City Treasurer’s Office. (Richel Ann P. Basiga, USJ-R Masscom Intern/BDB)(BANAT NEWS)