Kawani sa naga positibo sa drugas

CEBU, Philippines — Nagpositibo sa paggamit sa ilegal nga drugas ang usa ka kawani sa kagamhanan sa Dakbayan sa Naga atol sa random drug test nga gipahigayon sa Cebu Provincial Anti-Drug Abuse Office sa niaging semana.

Ang pangulo sa CPADAO, Carmen Remedios Durano-Meca niila lang sa lalaki nga usa ka job order kinsa bugtong siya lang ang nagpositibo sa 63 ka kawani nga gi-drug test.  Ipaubos pa sa confirmatory test ang resulta nga maoy basehan sa sunod nga lakang nga himoon sa kagamhanan sa maong kawani.

Ang drug test gipahigayon niadtong Hunyo 11 diin human sa duha ka adlaw, laing drug test gipahigayon sa kapolisan sa mao gihapon nga dakbayan apan walay nagpositibo.

Sa laing bahin, ang pagdeklarar og mga bag-ong drug-cleared barangays gikatakda karong Hunyo 19 sa Capitol Social Hall.

Matud ni Meca nga 59 ka barangay ang malakip sa unang 185 nga drug-cleared barangays.

Usa niini sa Sogod, 18 sa Borbon, siyam sa Alegria, duha sa Samboan, upat sa San Francisco, usa sa Dakbayan sa Naga, upat sa Oslob, 16 sa Tabogon, tulo sa Medellin ug usa sa San Remigio.

Ang Dakbayan sa Bogo ang nag-unang local government unit sa Probinsiya sa Sugbo nga gideklarar nga drug-cleared ang tibuok siyudad.

Human sa laing deklarasyon karong Martes, madugang sa Dakbayan sa Bogo ang mga Lungsod sa Pilar, Poro, Tudela, San Francisco, Alegria, Borbon, ug San Remigio diin tanang barangay ang drug-cleared na. Ang Probinsiya sa Sugbo aduna na unyay 244 drug-cleared barangays kon 22.8 porsiyento sa 1,066 sa barangays lukop probinsiya. (BANAT NEWS)