Gidudahang asset gipatay sa Talisay

CEBU, Philippines – Gidudahang asset ang gipatay sa wa ilhing mamumuno sa sitio Magay, Barangay Tanke, dakbayan sa Talisay niadtong Miyerkules sa gabii.

Ang biktima mao si Marecam Abarquez, nagpuyo sa Sitio Abalo, Barangay Cansojong sa maong siyudad nga lumad nga taga barangay Sangat sa lungsod sa San Fernando.

Si Supt. Marlu Conag, pangulo sa kapulisan sa dakbayan sa Talisay nibutyag nga naglakaw lang ang biktima sa maong lugar sa dihang kalit kining gipusil makadaghang higayon nga naigo sa nagkadaiyang parte sa iyang kalawasan.

Gisuwayan sa pagtabang ang biktima sa mga sakop sa Talisay Rescue Emergency Assistance Team (TREAT) apan nakabsan gyud kini sa kinabuhi.

Si Conag nagkanayon nga nailhan nga mogamit sa ginadiling drugas ang biktima ug nagtuo silang padung kini mopalit og drugas sa maong dapit.

Adunay nadawat nga impormasyon ang kapolisan nga  nadudahan ang biktima nga usa ka asset.

Padayon pa ang gihimong imbestigasyon sa kapolisan kon unsa ang motibo ug kinsa ang mamumuno sa biktima. (Gabriel Bonjoc ug Rafols E. Gervacio, CNU Intern/IBM)

Tagab inspirasyon sa uban

Gradwado sa University of the Visayas kinsa giilang usa sa 10 Outstanding Students of the Philippines sa rehiyon karong tuiga nagtinguha usab nga mosunod sa mga lakang sa topnotcher Jade Tagab, kinsa nakatapos usab sa maong unibersidad.

Ang 20 anyos nga si Vince Blessel Jane Baron naghagit nga mo-top usab sa board examinations alang sa mga magtutudlo karong Septiyembre.

“Yes, I am also aiming to top (the board examinations). But I feel so pressured since she (Tagab) ranked third. That is actually the highest rank now that a UV graduate has achieved. And it took some years before a UV graduate topped the exam,” matud niya.

Si Baron nanghinaut nga aduna pay mosunod nga makasulod sa top 10 nga highest spots sa eksaminasyon karong tuiga.

Si Baron mikuha og susamang kurso ni Tagab; nakumpleto niya ang four-year Bachelor of Elementary Education ug migradwar niadtong Abril 3, 2018.

Niadtong Mayo 26, giproklamar siya nga usa sa mga 10 Outstanding Students of the Philippines sa Central Visayas. Si Baron kinsa taga siyudad sa Sugbo anak sa usa ka public school teacher.

Nagpreparar na usab siya alang sa maong eksaminasyon ug nagplano nga mokuha og master’s degree program.

Niadtong adlaw nga Miyerkules ang duha gipakigkitaan nila ni UV President Eduardo “Eddiegul” Gullas ug igsuon nga si UV Executive Vice-President Jose “Dodong” Gullas.

Si Tagab nakadawat og refund sa iyahang tuition fee. Ang gift check nga P150,000 gitunol na sa iyaha. Samtang si Baron makadawat og refund sa tanang miscellaneous fee. (/IBM)(BANAT NEWS)