Langyaw nga nidala og menor diha sa iyang hotel gisikop

CEBU, Philippines — Usa ka 31-anyos nga Polish national ang gisikop sa Women and Children Protection Desk (WCPD) human nasakpan nga nagdala og usa ka menor de edad sulod sa usa ka hotel sa Barangay Kamputhaw, siyudad sa Sugbo niadtong miaging gabii.

Si Police Senior Inspector Sheila Gurtiza, hepe sa Cebu City Police Office (CCPO) WCPD mitug-an nga ang amahan sa biktima nakadawat og text message gikan sa iyang anak nga nagpahibawo nga anaa siya sa maong hotel kuyog ang usa ka langyaw.

Ang langyaw giila nga si Janusz Piotr Ciniewski, lumad nga taga Czestochowa, Poland ug kasamtangang nagbakasyon sa Sugbo.

Ang kapulisan kauban ang WCPD dali nga miresponde sa maong report hinungdan sa pagkasikop sa langyaw ug pagka-rescue sa 16 anyos nga biktima.

“Actually dili siya ganahan mogawas kay init unya mao na nagtuo iyang papa nga giunsa na siya didto sa sulod. Nagpakuha ra siya unya nagtuo iyang papa nga gimolestiya na siya or gi-abuse,” matud pa ni Gurtiza.

Nahibaw-an sa kapulisan nga nakit-an sa langyaw ang maong menor de edad samtang naglakaw-lakaw niadtong miaging gabii.

“Bale nakita niya (sa foreigner) nga galakaw lakaw ang minor nga gabii na ba unya ni offer ang foreigner nga adto lang  sa iyang place mo-stay. Nagtuo man ang foreigner na of age (legal) na siya ba, nga 18 years old siya mao ‘to nagkasinabot sila,” si Gurtiza midugang.

Ang langyaw mitug-an sa kapulisan nga ang biktima namakak kaniya sa iyang pangidaron ug miklaro nga wa gyud siya magtuo nga menor de edad kini.

Ang suspetsado kasamtangang gitanggong sa Fuente Police samtang wala pa makadesisyon ang pamilya sa biktima kon mosang-at ba kini og reklamo. - Chelsey Gaile B. Lapingcao, CNU Intern (BANAT NEWS)