Oposisyon wa nabalaka sa eleksiyon

CEBU, Philippines - Wala nabalaka ang kampo sa oposisyon sa konseho sa Dakbayan sa Sugbo sa resulta sa eleksiyon sa Barangay ug Sangguniang Kabataan karong Mayo 14.

Si Konsehal Joel Garganera niingon nga ang administrasyon karon wala’y nahatag nga kaayuhan sa mga barangay ilabi na sa proyekto sa inprastraktura ug uban pa.

Matud ni Garganera nga sukad nilingkod si Mayor Tomas Osmeña nalangay hinoon ang honorarium sa mga tanod, loaders, lupon ug uban pa.

Ang giumol nga Barangay Mayor’s Office (BMO) giingong duplication na sa barangay ug dugang gasto sa siyudad ug gihulagway ni Garganera nga pagpangandam sa sunod eleksiyon.

“Unsa may nahatag nila, usa pa ang ilang lami nga accomplishment gipangwaan ta og kaning mga vehicles, gipangkiha mi mga barangay hasta ko I’m still out of bail, gipanguha atong mga bus, ubang mga sakyanan, mao na iyang accomplishment,” matud ni Garganera.

Kapin 60 ka barangay sa Cebu City ang kaalyado sa Barug-Partido Demokratiko Pilipino-Lakas ng Bayan (PDP-Laban) ug masaligon sila si Garganera ug Konsehal Pastor Alcover Jr. nga dili sila makuhaan ug lagmit mapun-an pa hinoon.

“Kung na-weaken pa na ang foundation sa atong mga barangay officials sa una pa, pero karon gali with all the bullying, with all the harassment nga gihimo sa administrasyon wa man gyuy ni-surrender so that shows nga we have a very strong foundation sa atong barangay,” matud ni Alcover.

Samtang si Osmeña sa iyang bahin nibaliwala ra sa gisulti sa kaatbang niini.

Kini niingon nga normal lang sa politiko o kaha sa mga magpapili nga moingon nga dumadaug sila bisan og tataw ug klaro nga sila pildehunon. (/GMR)(BANAT NEWS)