P120 wage increase sa Central Visayas gipanawagan

CEBU, Philippines — Niduso ang Associated Labor Unions - Trade Union Congress of the Philippines sa ilang petisyon aron pausbawan og P120 nga sweldo matag adlaw alang sa pribadong mamumuo sa tibuok Central Visayas ngadto sa buhatan sa Regional Tripartite Wages and Productivity-7 kagahapong adlawa.

Si Atty. Nora Analyn Diego, ang bag-ong Regional Vice-President sa ALU-TUCP maoy personal nga niduso sa maong petisyon.

"We are hopeful that the wage board will approved the amount of our petition especially with the implementation of the TRAIN law that has slowly eroded the purchasing power of the workers," matud pa ni Diego.

Sa giluwatan nga pamahayag usab ni ALU-TUCP spokesman Alan Tanjusay, kini miingon nga ang kasamtangang minimum wage sa rehiyon P366.

Apan base sa pagtuon sa Bangko Sentral ng Pilipinas ug National Wages and Productivity Commission ang buying power niabot lang og P308.34 gumikan sa pagtaas sa mga palaliton og serbisyo sa rehiyon.

Masulbad lang kini kon patas-an ang minimum wage hinungdan nga sila miduso sa P120 wage pay hike.

Matud ni Diego nga base sa data sa gobiyerno nga ang rehiyon mao ang ikaupat nga labing dako nga kontribyutor sa Gross Domestic Product mao nga makiangayon lang nga mahatag ang ilang petisyon. (IBM) (BANAT NEWS)