Gidudahang may STI susihon

CEBU, Philippines — Ipaubos sa eksaminasyon ang unom ka minor de edad nga gidudahang natakbuyan og sexually transmitted infections (STIs) sa Lapu-Lapu City Health Office karong adlawa.

Matud ni Pajo Barangay Kapitan Junard “Ahong” Chan nga ang mga minor de edad nga bag-ong na-rescue apil sa 18 kabuok nga natala sa ilang barangay nga giingong natakbuyan og STI.

“They are willing to undergo (examination) kay nagsuspetsa sila nga nagka-STI sila,” matud ni Chan.

Ang STI makuha sa tawo sa pagpakighilawas sa natakbuyan na sa maong kagaw.

Matud ni Chan nga ang maong mga batan-on nakit-an sa kadalanan sa lawom na nga kagabhion niadtong Miyerkules ug Sabado ug gi-rescue sa mga barangay tanod subay sa curfew sa siyudad.

Gikataho nga adunay grupo sa mga batan-on nga gitawag og “Fam” diin ang bag-ong sakop kinahanglang makighilawas sa ubang sakop ug kun dili sila bunalan.

Ang mga batan-on nag-edad pa og 13 ngadto sa 16-anyos ug dili mga residente sa barangay ug wala magtungha.

Apan sa dili pa ipaubos sa eksaminasyon ang maong kabataan, ipatawag ni Chan ang mga ginikanan.

“At least kahibawo dayon ta nya dali ra ma-treat,” matud ni Chan.

Si Chief Inspector Junnel Caadlawon sa Gun-ob Police Station 3 niingon adunay pipila ka tinun-an nga sakop sa maong grupo.

Sa ilang pagpatuman sa curfew, matud ni Caadlawon nga ilang giingnan ang mga lider sa grupo nga dili mohimo og pagtugaw sa publiko.

Ila sab gi-edukar ang mga batan-on kabahin sa STI.

Ang isyu gikatakda nga tukion atol sa City Peace and Order Council meeting sunod semana nga pangulohan ni Mayor Paz Radaza.

Makig-alayon sab ang siyudad sa City Social Welfare Services sa pag-monitor sa kabataan nga nataptan sa infection.

“Hopefully ma-validate nato ang data ni Kap. Ahong para masalbar ang nga bata,” matud ni Radaza. (BANAT NEWS)