Rama abswelto apan Poblete guilty
Kini may kalabutan sa giingong pagpasirado kaniadto ni Rama sa Camia Street Café and Restaurant nga nahimutang diha sa Don Jose Avila Street, Barangay Capitol Site, dakbayan sa Sugbo. Paul Jun E. Rosaroso, File
CEBU, Philippines — Gibasura sa Ombudsman-Visayas ang kasong administratiba nga gipasaka batok kang kanhi Cebu City Mayor Michael Rama tungod kay giingong wala kini igong basehan nga nagpamatuod nga ang kanhi mayor nakahimo og kalapasan.
Kini may kalabutan sa giingong pagpasirado kaniadto ni Rama sa Camia Street Café and Restaurant nga nahimutang diha sa Don Jose Avila Street, Barangay Capitol Site, dakbayan sa Sugbo.
Niadtong Hunyo 30, 2015 si Rama miisyu kini og “closure order” batok sa nahisgutang establisamento nga gipanag-iya ni Eliane Lee kinsa igsuon sa reklamante nga si Adrian Lee.
Giingong niadtong higayona mi-expire na ang temporary business permit ni Eliane ug wala usab kini occupancy permit hinungdan nga gipa-revoke usab ang locational clearance ug fencing permit niini.
Subay niini, niadtong Marso 5, 2015, nipasaka og kasong administratiba si Adrian batok kang Rama ug Jose Marie Poblete, kanhi officer-in-charge sa Office of the Building Official sa dakbayan sa Sugbo. Si Lee mipasangil nga gihikawan siya sa iyahang katungod ug wala ipaagi sa due process ang gihimo ni Rama ug Poblete.
Giingong si Rama ug Poblete nagbase lang sa reklamo ni Antonio Lozada kinsa ang property sa naulahi nahimutang diha sa likod nga bahin sa property ni Lee.
Giingong si Lozada mipasangil kang Lee nga nakalapas sa ordinansa sa siyudad ilabi na sa “yard regulation requirement”.
Nasuta sa Ombudsman nga walay igong basehan ang maong pasangil batok kang Rama apan si Poblete guilty kini sa simple neglect of duty ug ang Ombudsman mimando sa pagsuspenso kaniya sulod sa tulo ka buwan.
Matud sa Ombudsman nga trabaho ni Poblete isip OIC sa OBO ang mopahigayon og imbestigasyon sa pasangil ni Lozada ug dili lang unta magbase sa CCZB findings kong nakahimo ba si Lee og kalapasan sa National Building Code.
Si Poblete wala na kini diha sa OBO ug matud sa Ombudsman nga ang silot nga tulo ka buwan nga pagkasuspenso nga walay sweldo i-convert kini og multa nga tukma sa tulo ka buwan nga sweldo ni Pobleto. (BDB) (BANAT NEWS)
- Latest
