Konsehal, laing 4 sikop sa buy-bust

CEBU, Philippines — Nasikop ang konsehal sa Barangay Tangke, Dakbayan sa Talisay kuyog sa upat ka durugista sa buy-bust operation sa Sitio Tunga sa maong barangay niadtong Miyerkules sa alas 4:55 sa hapon.

Giila sa kapolisan nga high-value target si Romeo Santillan, 38-anyos, gumikan kay siya usa ka opisyal sa barangay.

Ang laing upat nga nasikop mao sila si Chuck Filoteo, 32, taga Riverside 1, Barangay Cansojong, ug sila si Charlie Obrero, 41; Danny Racaza, 22, ug Neil Cabardo, pulos taga Barangay Tangke.

Si SPO2 Yvonne Ilustrisimo sa Talisay City Police Station niingon nga si Filoteo gyud ang ilang gikasabot nga ilang palitan og drugas ug ila gyud nga nakuptan.

Dihang nahitabo na ang komosyon, nidagan ug nisaka sa ikaduhang andana sa giabangang panimalay si Santillan nga nakit-ang nagbitbit og armas.

Dali nga gisunod sa mga operatiba ug nakorner hinoon wala nagpabuto sa armas ang konsehal.

Si Filoteo nakuhaan og 18 ka gagmay nga pakete sa shabu ug kwarta samtang si Santillan ang nakuhaan og duha ka gagmay nga pakete sa shabu ingon man .9mm nga pusil nga adunay tulo ka bala.

Ang tulo nga nasikop ang naapil sab sa pagkapriso tungod kay nagsuyop kini sa lugar nga gisak-an ni Santillan.

Si Supt. Jason Villamater, ang outgoing nga hepe TCPS, nibutyag nga surrenderer si Santillan apan nagpadayon gihapon sa ilegal nga kalihukan.

Si Santillan nibutyag nga igo lang siya naglimpyo sa iyang armas apan dili iya ang drugas.

Ikaduha siya nga konsehal sa barangay nga naghupot sa committee on infrastructure. (GMR)  (BANAT)