‘Millennials’ target sa Suroy-Suroy Sugbo
CEBU, Philippines — Gawas sa mga balikbayan, target sa Kapitolyo ang mga millennials sa pagbalik sa Suroy–Suroy Sugbo sunod tuig.
Matud ni Joselito “Boboi” Costas, pangulo sa Provincial Tourism Office (PTO), nga kini panganlan og Suroy Suroy Sugbo Adventure Round South diin maapil na ang pipila sa mga iladong falls ug ang extreme adventure nga canyoneering sa Badian ug Alegria.
“We are targeting millennials naay canyoneering, Tumalog Falls and Aguinid Falls,” sumala pa ni Costas.
Siya nagkanayon nga target nila ang 100 ka participants sa tulo ka adlaw nga kalihukan nga molibot sa dili mominus 12 ka lungsod sa habagatang bahin sa Lalawigan sa Sugbo nga magsugod sa Enero 24 ngadto sa petsa 26 o human sa Sinulog 2018.
Sa itinerary nga giandam sa PTO ug Provincial Tourism Council, ang unang adlaw sa Suroy-Suroy adto magsugod sa Lungsod sa Argao dayon sa Dalaguete, Boljoon ug Oslob.
Sa ikaduhang adlaw, magsugod sa Oslob, Santander, Samboan, Ginatilan, Alegria, Badian ug Moalboal.
Sa katapusang adlaw, adto na mosuroy sa Barili deretso sa uwahing destinasyon sa Dakbayan sa Carcar.
Sa pagkakaron matud ni Costas nga wala pa nila ma-finalize ang package fee alang sa Suroy-Suroy sanglit ila pang giproseso ang mga bakanteng rooms nga temporaryong puy-an sa mga partisipante. (BANAT NEWS)
- Latest
