Ormoc hatagan og P1M hinabang

CEBU, Philippines — Ang Kapitolyo mohata na sa sunod semana sa usa ka milyon ka pesos nga donasyon ngadto sa dakbayan sa Ormoc sa Leyte.

Sumala ni Emmanuel “Manny” Guial ang provincial treasurer nga giproseso na ang tseke alang sa maong donasyon ug uban mga dokumento nga kinahanglan.

Pipila sa mga kinahanglang rekisitos niini mao ang resolusyon gikan sa lokal nga kagamhanan sa Ormoc nga nagsaysay sa ilang state of calamity ug ang resolusyon sa Sangguniang Panlalawigan nga nagsaysay sa ihatag nga donasyon sa Kapitolyo ngadto sa maong dakbayan.

Sumala ni Julius Regner ang tigpamaba sa Provincial Disaster Risk Reduction and Management Office (PDRRMO) nga nalangay ang pagproseso niini sanglit wala dayon maabot sa ilang buhatan ang resolusyon nga gipasar sa provincial board.

Niadtong bulan aa Agosto si Gob. Hilario Davide III mibisita sa lungsod sa Kananga sa lalawigan Leyte aron sa paghatag sa hinabang sa probinsya sa maong lungsod nga usa ka milyon ka pesos human naigo sa linog niadtong bulan sa Hulyo karong tuiga.

Atol sa pagbisita ni Davide, nahimamat usab niya ang Mayor sa Ormoc Richard Gomez kon diin personal kini nangayo og tabang sa gobernador alang sa rehabilitasyon sa maong dakbayan nga naigo usab sa susamang linog. (BANAT NEWS)